കായംകുളം: കായംകുളത്ത് പട്ടാപ്പകല്‍ റോഡിലൂടെ നടന്നുപോയ യുവതിയെ കടന്നുപിടിച്ച സംഭവത്തില്‍ രണ്ടു യുവാക്കള്‍ അറസ്റ്റില്‍. ഓച്ചിറ മേമന ഐശ്വര്യയില്‍ നിധിന്‍ എസ്.(28) മുതുകുളം ഗീതാ ഭവനില്‍നിന്നും മേമന പുത്തന്‍തറയില്‍ താമസിക്കുന്ന വിശാഖ് (28) എന്നിവരാണ് അറസ്റ്റിലായത്.
ശനിയാഴ്ച വൈകിട്ട് നാലരയോടെ ദേശീയ പാതയില്‍ കെ.എസ്.ആര്‍.ടി.സി.ജംഗ്ഷനു സമീപം വച്ചായിരുന്നു ബംഗളൂരു മോഡല്‍ പീഡനശ്രമം. റോഡിലൂടെ ഒറ്റയ്ക്കുനടന്നു പോകുകയായിരുന്ന യുവതിയെ സ്‌കൂട്ടറില്‍ എത്തിയ ഇവര്‍ കടന്നുപിടിക്കുകയായിരുന്നു. സ്‌കൂട്ടറിന്റെ പിന്നിലിരുന്ന നിധിനാണ് യുവതിയെ ആക്രമിച്ചത്. പെട്ടെന്നുള്ള ആക്രമണത്തില്‍ പകച്ചുപോയ യുവതി ബഹളം വച്ചതിനെ തുടര്‍ന്ന് ഇരുവരും കടന്നു കളഞ്ഞു. സ്‌കൂട്ടറിന്റെ നമ്പര്‍ സഹിതം യുവതി പൊലിസില്‍ പരാതി നല്‍കി.ഇതേ തുടര്‍ന്ന് സി ഐ. സദന്‍, എസ്.ഐ.അനൂപ് എന്നിവരുടെ നേതൃത്വത്തിലുള്ള പൊലിസ് സംഘം ഇന്നലെ രാവിലെ ഇരുവരെയും ഓച്ചിറയില്‍നിന്നും അറസ്റ്റു ചെയ്തു. ബന്ധുവിന്റെ സ്‌കൂട്ടറിലായിരുന്നു ഇരുവരും സഞ്ചരിച്ചത്.സംഭവ സമയം ഇവര്‍ മദ്യലഹരിയിലായിരുന്നുവെന്ന് പൊലിസ് പറഞ്ഞു. ഇരുവരെയും കോടതിയില്‍ ഹാജരാക്കി.