മൂന്നാര്‍: വിനോദസഞ്ചാരികളുടെ വാഹനത്തില്‍ മരച്ചില്ലകള്‍ ഒടിഞ്ഞുവീണു. സന്ദര്‍ശകര്‍ രക്ഷപ്പെട്ടതു തലനാരിഴയ്ക്ക്.
ഇന്നലെ രാവിലെ മൂന്നാര്‍ സന്ദര്‍ശനത്തിനെത്തിയ എറണാകുളം സ്വദേശികളായ സുമേഷും സംഘവും സഞ്ചിരിച്ച വാഹനത്തിനു മുകളിലാണു മരച്ചില്ല ഒടിഞ്ഞുവീണത്. മൂന്നാര്‍ കോളനി റോഡിലെ സര്‍ക്കാര്‍ വിദേശമദ്യഷോപ്പിനു സമീപത്തു വാഹനം പാര്‍ക്ക് ചെയ്യവേ ചില്ലയൊടിഞ്ഞു വാഹനത്തിന്റെ മുന്‍വശത്തെ ഗ്ലാസ് തകര്‍ത്ത് സീറ്റില്‍ പതിക്കുകയായിരുന്നു.
നൂറുകണക്കിനു സന്ദര്‍ശകരെത്തുന്ന സര്‍ക്കാര്‍ അതിഥി മന്ദിരത്തിന്റെ സമീപത്തെ യൂക്കാലിമരങ്ങള്‍ വെട്ടിനീക്കണമെന്നു പ്രദേശവാസികള്‍ അധികൃതര്‍ക്കു പരാതി നല്‍കിയിരുന്നെങ്കിലും തുടര്‍നടപടികളുണ്ടായില്ല.