കോഴിക്കോട്: അറബിക് സാഹിത്യോത്സവത്തോടനുബന്ധിച്ചു നടന്ന അറബിക് ചിത്രീകരണത്തില്‍ തീവ്രവാദവും സാമൂഹ്യമാധ്യമങ്ങളുടെ അതിപ്രസരവും ഗ്രാമീണ തനിമയും വിഷയങ്ങളായി. പത്തോളം ടീമുകള്‍ മാറ്റുരച്ചപ്പോള്‍ കശ്മിരി തീവ്രവാദത്തിന്റെ നേരനുഭവങ്ങള്‍ വിവരിക്കുന്ന 'കുരുതിപ്പൂക്കള്‍' ഹൈസ്‌കൂള്‍ വിഭാഗത്തിലെ മികച്ച നാടകമായി.
വില്യാപ്പള്ളി എം.ജെ.വി.എച്ച്.എസ്.എസിലെ ശാദില്‍, സഹദ്, സഫ്‌വാന്‍, സൈദ്, ശഹാന ഷെറിന്‍, ഫര്‍സാന, ലിയാന, റാഹിദ്, സജ്ഫല്‍, നുസൈഫ് എന്നിവര്‍ തീവ്രവാദികളും വേദനകളനുഭവിക്കുന്ന കുരുന്നുകളുമായി അഭിനയിച്ചപ്പോള്‍ സദസും വിധികര്‍ത്താക്കളും ഒരുമിച്ച് ഒന്നാം സ്ഥാനം നിശ്ചയിക്കുകയായിരുന്നു. കഴിഞ്ഞ 13 വര്‍ഷമായി അറബിക് ചിത്രീകരണത്തിലെ കുത്തക ഇത്തവണയും ഇവര്‍ നിലനിര്‍ത്തി. പ്രേമാനന്ദനാണ് ചിത്രീകരണത്തിന്റെ സംവിധാനം നിര്‍വഹിച്ചത്.