പഴയങ്ങാടി: പാരിസ്ഥിതിക പ്രധാന്യമുള്ള പ്രദേശങ്ങളില്‍ ഏറെ വ്യത്യസ്തവും ജൈവ വൈവിധ്യകേന്ദ്രത്തിന്റെ സംഗമഭൂമിയുമായ മാടായിപ്പാറയെ സംരക്ഷിക്കാന്‍ സംസ്ഥാന ജൈവവൈവിധ്യ ബോര്‍ഡ് രംഗത്ത്. മാടായിപ്പാറയെ സംസ്ഥാനത്തെ ആദ്യത്തെ ജൈവ വൈവിധ്യ പൈതൃക സംരക്ഷണ കേന്ദ്രമാക്കി മാറ്റാനുള്ള പദ്ധതിയുടെ ഭാഗമായി ടി.വി രാജേഷ് എം.എല്‍.എയുടെ നേതൃത്വത്തില്‍ സംസ്ഥാന ജൈവ വൈവിധ്യ ബോര്‍ഡ് സെക്രട്ടറി ദിനേശന്‍ ചെറുവാട്ടില്‍, ചിറക്കല്‍ കോവിലകം എക്‌സിക്യൂട്ടീവ് ഓഫിസര്‍ ടി രാജേഷ്, മാടായിക്കാവ് മാനേജര്‍ എന്‍ നാരായണ പിടാരര്‍, വി വിനോദ് എന്നിവര്‍ മാടായിപ്പാറയിലെത്തി ബന്ധപ്പെട്ട ഉദ്യോഗസ്ഥനുമായി ചര്‍ച്ച നടത്തി.
മാടായിപ്പാറയിലെ ജൈവൈവിധ്യ കേന്ദ്രത്തിനു യാതൊരുവിധ കോട്ടംതട്ടാത്ത വിധത്തിലും ഉടമസ്ഥാവകാശം ഉടമസ്ഥരില്‍ തന്നെ നിലനിര്‍ത്തിക്കൊണ്ടും ആചാരാനുഷ്ഠാനങ്ങളെ പരിപൂര്‍ണമായും സംരക്ഷിച്ചുമാണു പദ്ധതി നടപ്പാക്കുക. പ്രദേശവാസികളെ പാറ സംരക്ഷണ പ്രവര്‍ത്തനങ്ങളില്‍ പങ്കാളികളാക്കുന്ന രീതിയുമാണ് ഇതിന്റെ പ്രത്യേകത. ജൈവ വൈവിധ്യ കേന്ദ്രങ്ങള്‍ക്കു നിയമപരമായ പരിരക്ഷ നല്‍കുക എന്നതാണു പദ്ധതിയുടെ ലക്ഷ്യം.