നിലമ്പൂര്‍: മതേതരത്വത്തിന്റെ സന്ദേശമാണ് പാട്ടുത്സവം ടൂറിസം ഫെസ്റ്റിവല്‍ പങ്കുവയ്ക്കുന്നതെന്ന് സിനിമാതാരം ജഗദീഷ്. മതസൗഹാര്‍ദ്ദ സന്ദേശം പകരുന്ന പാട്ടുകള്‍ പാടി പതിനൊന്നാമത് പാട്ടുത്സവ് ടൂറിസംഫെസ്റ്റിവലിന്റെ മെഗാ സ്റ്റേജ് ഷോകള്‍ അദ്ദേഹം ഉദ്ഘാടനം ചെയ്തു.
സിനിമാനടനാകും മുമ്പ് എടപ്പാള്‍ കനാറാ ബാങ്കില്‍ ജീവനക്കാരനായും പിന്നീട് മഞ്ചേരി എന്‍.എസ്.എസ് കോളജില്‍ അധ്യാപകനുമായി ഔദ്യോഗിക ജീവിതം ആരംഭിച്ച മലപ്പുറവുമായുള്ള ബന്ധവും പങ്കുവച്ചു. മനുഷ്യരെ ജാതിയും മതവും രാഷ്ട്രീയവുമായി വേര്‍തിരിക്കാതെ ഒരുമിപ്പിക്കുകയാണ് ഇത്തരം കലാവിരുന്നുകളെന്നും അവ നിലനില്‍ക്കണമെന്നും വ്യക്തമാക്കി. പാട്ടുപാടിയും സിനിമാ ഡയലോഗുകള്‍ പറഞ്ഞും ജഗദീഷ് ജനങ്ങള്‍ കൈയിലെടുത്തു.
സംഘാടകസമിതി ചെയര്‍മാന്‍ ആര്യാടന്‍ ഷൗക്കത്ത് അധ്യക്ഷനായി. ഗോകുലംഗ്രൂപ്പ് ചെയര്‍മാന്‍ ഗോകുലം ഗോപാലന്‍, പോപ്പീസ് ഗ്രൂപ്പ് ചെയര്‍മാന്‍ ഷാജു തോമസ്, മേരിമാതാ ഹയര്‍ എജ്യുക്കേഷന്‍ ട്രസ്റ്റ് എം.ഡി സിബി വയലില്‍ എന്നിവരെ ജഗദീഷ് ആദരിച്ചു.