തൃശൂര്‍: മണ്ണും ജലവും പുണ്യസങ്കേതങ്ങളേക്കാളേറെ പരിപാവനതയോടെ സംരക്ഷിക്കണമെന്ന് കൃഷിമന്ത്രി അഡ്വ. വി.എസ് സുനില്‍കുമാര്‍. ജില്ലയിലെ ചാലുകളും തോടുകളും മാത്രമല്ല അടുത്തഘട്ടത്തില്‍ ഉപയോഗശൂന്യമായിക്കിടക്കുന്ന കുളങ്ങളും ചിറകളും നവീകരിച്ച് രണ്ട് വര്‍ഷത്തിനകം ഉപയോഗക്ഷമമാക്കുന്നതിനും നബാര്‍ഡിന്റെ സാമ്പത്തിക സഹായത്തോടെ നടപ്പിലാക്കുന്ന ഗ്രാമീണ അടിസ്ഥാനവികസന പദ്ധതിയില്‍ നടപടി സ്വീകരിക്കാന്‍ മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി.
മണ്ണുപര്യവേക്ഷണ-മണ്ണുസംരക്ഷണ വകുപ്പ് സംസ്ഥാനത്തിന്റെ വിവിധ ജില്ലകളിലായി നടപ്പിലാക്കുന്ന 49.61 കോടിരൂപയുടെ 31 പദ്ധതികളുടെ സംസ്ഥാനതല ഉദ്ഘാടനം വില്ലടം ഹയര്‍സെക്കന്‍ഡറി സ്‌കൂളില്‍ നിര്‍വഹിച്ച് സംസാരിക്കുകയായിരുന്നു മന്ത്രി.
ഇരിങ്ങാലക്കുട മുനിസിപ്പാലിറ്റിയുടെ മണ്ണു ഭൂവിഭവ റിപ്പോര്‍ട്ടിന്റെ പ്രകാശനവും കേന്ദ്രാവിഷ്‌കൃത സോയില്‍ ഹെല്‍ത് കാര്‍ഡ് പദ്ധതിപ്രകാരം മുളംകുന്നത്ത്കാവ് ഗ്രാമപഞ്ചായത്തിലെ കര്‍ഷകര്‍ക്കായി തയാറാക്കിയ സോയില്‍ ഹെല്‍ത് കാര്‍ഡുകളുടെ വിതരണവും ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ നിര്‍വഹിച്ചു.
മേയര്‍ അജിതാജയരാജന്‍ അധ്യക്ഷയായി. നഗരസഭാ സ്ഥിരം സമിതി അധ്യക്ഷന്മാരായ അജിതാ വിജയന്‍, എം.ആര്‍ റോസിലി, ജില്ലാപഞ്ചായത്ത് വികസന സ്റ്റാന്റിങ് കമ്മിറ്റി ചെയര്‍പേഴ്‌സണ്‍ ജിന്നിജോസ്, പ്രതിപക്ഷനേതാവ് അഡ്വ. എം.കെ മുകുന്ദന്‍, കൗണ്‍സിലര്‍ ശാന്ത അപ്പു തുടങ്ങിയവര്‍ സംബന്ധിച്ചു.