കൊട്ടിയം: തൃക്കോവില്‍വട്ടം ഗ്രാമപഞ്ചായത്ത് അതിര്‍ത്തിയില്‍ മലിനജലം അര്‍ധരാത്രിയില്‍ വാഹനത്തില്‍ കൊണ്ടുവന്ന് റോഡിലും പരിസരങ്ങളിലും ഒഴുക്കുന്നതായി പരാതി. കൃത്യമായ നടപടിയെടുക്കാന്‍ ആരോഗ്യവകുപ്പോ പൊലിസോ തയാറാകുന്നില്ലെന്ന് ആക്ഷേപമുണ്ട്.
കഴിഞ്ഞയാഴ്ച ഇതിനായെത്തിയ കണ്ടെയ്‌നര്‍ ലോറി നാട്ടുകാര്‍ പിന്തുടര്‍ന്ന് പിടികൂടിയിരുന്നു. കണ്ടെയ്‌നര്‍ ലോറിക്കുള്ളില്‍ ടാങ്കുകള്‍ ഘടിപ്പിച്ച് അതിനുള്ളില്‍ മലിനജലം നിറച്ചു കൊണ്ടുവന്ന ലോറിയാണ് നാട്ടുകാര്‍ പിടികൂടിയത്.
പുതുച്ചിറ ഡീസന്റ്മുക്ക് റോഡില്‍ മലിനജലം ഒഴുക്കി വരികയായിരുന്ന ലോറി ഡീസന്റ് മുക്കില്‍ എത്തിയപ്പോള്‍ രൂക്ഷമായ ദുര്‍ഗന്ധം ഉണ്ടായി. തുടര്‍ന്ന് ജങ്ഷനില്‍ നബിദിനാഘോഷത്തിന്റെ ഭാഗമായി പാചകത്തില്‍ ഏര്‍പ്പെട്ടിരുന്നവര്‍ അടുത്തേക്ക് വന്നപ്പോഴേക്കും ലോറി അതിവേഗത്തില്‍ ഓടിച്ചു പോയി.ഈ ലോറി നാട്ടുകാര്‍ പിന്തുടര്‍ന്ന് പിടികൂടുകയായിരുന്നു.
ഇത്തരത്തില്‍ സ്ഥിരമായി ചില ഫാക്ടറികളും ഹോട്ടലുകളും മലിനജലം വാഹനത്തില്‍ കയറ്റിക്കൊണ്ടു വന്ന് റോഡില്‍ പലയിടത്തും ഒഴുക്കുന്നത് പതിവായിരിക്കുകയാണെന്ന് നാട്ടുകാര്‍ പറയുന്നു.