പയ്യന്നൂര്‍: ഏഴിമല താഴ്‌വരകളുടെ മനോഹാരിത നശിപ്പിച്ച് ജനങ്ങള്‍ക്ക് ദുരിതമാകുന്ന രീതിയില്‍ നടന്നുകൊണ്ടിരിക്കുന്ന അനധികൃത മണ്ണെടുപ്പിന് രാമന്തളി പഞ്ചായത്തില്‍ നിയന്ത്രണം. ചെങ്കല്‍ ക്വാറികളും കുന്നിടിച്ചുള്ള അനധികൃത മണ്ണെടുപ്പും അനിയന്ത്രിതമായതോടെ പഞ്ചായത്തിന്റെ നേതൃത്വത്തില്‍ വിളിച്ചുചേര്‍ത്ത രാഷ്ട്രീയ പാര്‍ട്ടി പ്രതിനിധികളുടെ യോഗത്തിലാണ് തീരുമാനം.
രാമന്തളി പഞ്ചായത്തിനു പുറത്തേക്ക് മണ്ണ് കൊണ്ടുപോകുന്നതിന് പൂര്‍ണമായും വിലക്ക് ഏര്‍പ്പെടുത്തും. പഞ്ചായത്തിലെ ജനങ്ങളുടെ വിവിധ നിര്‍മാണ പ്രവൃത്തികള്‍ക്കാവശ്യമായ മണ്ണ് വില്ലേജ് ഓഫിസറുടെ അനുമതിയോടെ കൊണ്ടുപോകാം. കുന്നിടിച്ച് മണ്ണെടുക്കുന്നത് നിയന്ത്രിക്കുവാനും അനുമതിയോടെ പഞ്ചായത്തിലെ ആവശ്യക്കാര്‍ക്ക് മണ്ണ് നല്‍കുന്നതിനുള്ള പ്രവൃത്തികള്‍ നിരീക്ഷിക്കുന്നതിനും പഞ്ചായത്ത് പ്രസിഡന്റ് എം.വി ഗോവിന്ദന്‍ ചെയര്‍മാനും വില്ലേജ് ഓഫിസര്‍ കണ്‍വീനറുമായി കമ്മിറ്റിയും രൂപീകരിച്ചു. ചെങ്കല്‍ ക്വാറികളില്‍ നിന്നുള്ള മണ്ണ് പുറത്തു കൊണ്ടുപോകാതെ കുഴികളില്‍ തന്നെ നിക്ഷേപിക്കണമെന്ന വ്യവസ്ഥയിരിക്കെ ഏഴിമല താഴ്‌വരകളിലെ ചെങ്കല്‍ ക്വാറികളില്‍ നിന്നു വ്യാപകമായി മണ്ണ് കടത്തുന്നതും യോഗത്തില്‍ ചര്‍ച്ചയായി. പഞ്ചായത്ത് പ്രസിഡന്റ് എം.വി ഗോവിന്ദന്‍ അധ്യക്ഷനായി. കെ വിജീഷ്, ഒ.കെ ശശി, ഇ.സി ഭാസ്‌കരന്‍, പി.എം അബ്ദുല്‍ ലത്തീഫ്, പരത്തി ഗോവിന്ദന്‍, എം ചന്ദ്രന്‍ പങ്കെടുത്തു.