കിഴിശ്ശേരി: മുതുവല്ലൂര്‍ പഞ്ചായത്തില്‍ ഉദ്യോഗസ്ഥരുടെ കൊഴിഞ്ഞുപോക്ക് തുടരുന്നു. അസി.സെക്രട്ടറിക്കു പുറമെ സെക്രട്ടറിയും എച്ച്.സിയും യു.ഡി ക്ലര്‍ക്കും കൂടി പടിയിറങ്ങുന്നതോടെ പഞ്ചായത്ത് ഭരണം അവതാളത്തിലാവും. രണ്ടു മാസം മുമ്പാണ് അസി.സെക്രട്ടറി സ്ഥലംമാറി പോയത്. ഇതോടെ ജോലി മുഴുവന്‍ സെക്രട്ടറിയുടെ ചുമലിലായി. രണ്ടു മാസം പിന്നിട്ടിട്ടും അസി.സെക്രട്ടറിക്ക് പകരക്കാരനെത്തിയിട്ടില്ല.
നിലവില്‍ പഞ്ചായത്ത് സെക്രട്ടറിയായ പുളിക്കല്‍ സ്വദേശി അബ്ദുറഷീദ് നീണ്ട അവധിയില്‍ പ്രവേശിക്കുകയാണ്. മെയ് മാസം ഇദ്ദേഹം സര്‍വീസില്‍ നിന്ന് പിരിയുകയും ചെയ്യും. നാലു മാസത്തെ ലീവു കഴിഞ്ഞു പഞ്ചായത്തില്‍ ജോയിന്‍ ചെയ്ത ഉടനെ സര്‍വീസില്‍ നിന്നു വിരമിക്കാനാണ് ഇദ്ദേഹത്തിന്റെ തീരുമാനം. സാധാരണ സെക്രട്ടറി അവധിയില്‍ പ്രവേശിക്കുമ്പോള്‍ അസി.സെക്രട്ടറിക്ക് ചാര്‍ജ് നല്‍കാറാണ് പതിവ്. എന്നാല്‍ സെക്രട്ടറിയും അസി.സെക്രട്ടറിയും ഇല്ലാതാവുന്നതോടെ പഞ്ചായത്തിലെ വികസന പ്രവര്‍ത്തനങ്ങള്‍ക്കൊപ്പം ദൈനംദിന പ്രവര്‍ത്തനങ്ങളും അവതാളത്തിലാവും.
അസി.സെക്രട്ടറിയുടെ അഭാവത്തില്‍ കാര്യങ്ങള്‍ നടത്തേണ്ട എച്ച്.സിയും പഞ്ചായത്തില്‍ നിന്ന് പടിയിറങ്ങുന്നതോടെ പഞ്ചായത്തില്‍ ഭരണസ്തംഭനം പൂര്‍ണമാവും. അംഗീകാരം ലഭിച്ച റോഡ്, കെട്ടിട നിര്‍മാണ പ്രവര്‍ത്തനങ്ങളെ ഉദ്യോഗസ്ഥരുടെ ഈ കൊഴിഞ്ഞുപോക്ക് സാരമായി ബാധിക്കും. ഇതിനു പുറമെ അസി. എന്‍ജിനിയറില്ലാത്തതും പ്രശ്‌നങ്ങള്‍ സൃഷ്ടിക്കുന്നു. സാമ്പത്തിക വര്‍ഷം അവസാനിക്കാന്‍ മാസങ്ങള്‍ മാത്രമേ ഉള്ളൂവെന്നിരിക്കെ ഉദ്യേഗസ്ഥരുടെ അഭാവം കാരണം വലിയ പ്രയാസമാണ് നേരിടുന്നതെന്ന് പഞ്ചായത്ത് പ്രസിഡന്റ് കെ.എ സഗീര്‍ പറഞ്ഞു.
ലോക ബാങ്കിന്റെ സഹായത്തോടെ രണ്ട് കോടിയുടെ ആറു പദ്ധതികള്‍ പഞ്ചായത്തില്‍ നടപ്പാക്കാനിരിക്കുകയാണ്. എന്നാല്‍ അസി.സെക്രട്ടറി ഇല്ലാതെ ഇത്തരം പ്രവര്‍ത്തനങ്ങള്‍ക്ക് അംഗീകാരം ലഭിക്കലും അത് മുമ്പോട്ടു കൊണ്ടു പോകലും പ്രയാസമാണ്.
പള്ളിക്കല്‍ ഗ്രാമ പഞ്ചായത്തിലെ അസി. എന്‍ജിനിയര്‍ക്ക് മുതുവല്ലൂര്‍ പഞ്ചായത്തിലെ അധിക ചുമതല നല്‍കിയിരിക്കുകയാണെന്നും ഇതു കാരണം പദ്ധതി നടത്തിപ്പിനു കാല താമസം നേരിടുമെന്നും അദ്ദേഹം പറഞ്ഞു.