അരീക്കോട്: സംസ്ഥാന സര്‍ക്കാറിന്റെ ഹരിതകേരളം പദ്ധതി നടപ്പാക്കിയിട്ടും മാലിന്യത്തില്‍ നിന്ന് മുക്തമാകാതെ ചാലിയാര്‍ തീരം. ഗ്രാമപഞ്ചായത്തുകളുടെ നേതൃത്വത്തില്‍ പദ്ധതിയുടെ ഭാഗമായി റോഡും പരിസരവും ബസ് സ്റ്റാന്‍ഡുകളും ശുചീകരിച്ചെങ്കിലും പുഴയോരത്തേക്ക് അധികൃതരുടെ കണ്ണെത്തിയിട്ടില്ല.
അരീക്കോട് കിഴുപറമ്പ് പഞ്ചായത്തുകളെ ബന്ധിപ്പിക്കാന്‍ ചാലിയാറിന് കുറുകെ സ്ഥാപിച്ച അരീക്കോട് പാലത്തിന് ചുവട്ടിലും കിഴുപറമ്പ് ഊര്‍ങ്ങാട്ടീരി പഞ്ചായത്തുകളെ ബന്ധിപ്പിക്കുന്ന ചെറുപുഴ പാലത്തിന് സമീപവുമാണ് മാലിന്യങ്ങള്‍ കുന്ന് കൂടികിടക്കുന്നത്.
ഹരിതകേരളം പദ്ധതിയുടെ ഭാഗമായി പാലത്തിന്റെ മുകള്‍ ഭാഗം പഞ്ചായത്ത് അധികൃതരും സന്നദ്ധ സംഘടനകളും ശുചീകരിച്ചിരുന്നെങ്കിലും പാലത്തിന് താഴെയുള്ള മാലിന്യം നീക്കം ചെയ്തിരുന്നില്ല. പ്ലാസ്റ്റിക്മാലിന്യങ്ങള്‍ക്ക് പുറമെ അറവുമാലിന്യങ്ങളും പാലത്തിന് താഴെ നിക്ഷേപിക്കുന്നുണ്ട്.
പുഴയോരത്ത് മാലിന്യം നിക്ഷേപിക്കുന്നതോടെ പുഴ മലിനമാകുകയും ചെയ്യുന്നു. പുഴയോരത്ത് കൂടെയുള്ള സഞ്ചാരത്തിന് മൂക്കുപൊത്തേണ്ട അവസ്ഥയാണ്.