കൊച്ചി: ഹൈക്കോടതിയില്‍ നിന്നു കേസ് ഫയല്‍ കാണാതായ സംഭവത്തില്‍ പൊലിസിനു പരാതി നല്‍കേണ്ടതില്ലെന്നു ഹൈക്കോടതിയുടെ ഭരണ നിര്‍വഹണസമിതി തീരുമാനിച്ചു. പാലക്കാട്ടെ 70 ഏക്കര്‍ പാടശേഖരത്തിന്റെ ഉടമസ്ഥാവകാശത്തര്‍ക്കം സംബന്ധിച്ചുള്ള ഉത്തരവിനെതിരേ പാലക്കാട് പൊല്‍പ്പുള്ളി സ്വദേശി കണ്ടമുത്തന്‍ നല്‍കിയ അപ്പീലിന്റെ ഫയലുകളാണു കാണാതായത്.
ഫയല്‍ സൂക്ഷിച്ചിരുന്ന സെക്ഷനിലെ ഓഫിസര്‍ക്കും കേസില്‍ പ്രതിഭാഗത്തിനു വേണ്ടി ഹാജരായ അഭിഭാഷകന്റെ ഗുമസ്തനും കാരണം കാണിക്കല്‍ നോട്ടിസ് നല്‍കാന്‍ ജഡ്ജിമാരുള്‍പ്പെട്ട ഭരണ നിര്‍വഹണസമിതി നിര്‍ദേശിച്ചിട്ടുണ്ട്. ഫയല്‍ സൂക്ഷിച്ചിരുന്ന സെക്ഷനില്‍ ജീവനക്കാര്‍ക്കു പുറമേ അഭിഭാഷകര്‍ക്കും ഗുമസ്തന്മാര്‍ക്കും മാത്രമാണ് പ്രവേശനമെന്നും ഇവരില്‍ ചിലര്‍ അറിയാതെ ഫയല്‍ നഷ്ടപ്പെടില്ലെന്നും വ്യക്തമാക്കി ഹൈക്കോടതി വിജിലന്‍സ് വിഭാഗം രജിസ്ട്രാര്‍ക്ക് റിപ്പോര്‍ട്ട് നല്‍കിയിരുന്നു.