മുംബൈ: തോല്‍വിയോടെ എം.എസ് ധോണി ഇന്ത്യയുടെ നായക സ്ഥാനം ഒഴിഞ്ഞു. ഇംഗ്ലണ്ട് ഇലവനെതിരായ സന്നാഹ മത്സരത്തില്‍ ധോണി നയിച്ച ഇന്ത്യ എ ടീം മൂന്നു വിക്കറ്റിനു തോല്‍വി വഴങ്ങിയതോടെയാണ് നായകനെന്ന നിലയില്‍ അവസാന മത്സരത്തില്‍ ധോണിക്ക് നിരാശപ്പെടേണ്ടി വന്നത്. ആദ്യം ബാറ്റു ചെയ്ത ഇന്ത്യ എ ടീം 50 ഓവറില്‍ അഞ്ചു വിക്കറ്റ് നഷ്ടത്തില്‍ 304 റണ്‍സെന്ന മികച്ച സ്‌കോര്‍ പടുത്തുയര്‍ത്തിയെങ്കിലും ഇംഗ്ലണ്ട് ഇലവന്‍ 48.5 ഓവറില്‍ ഏഴു വിക്കറ്റ് നഷ്ടത്തില്‍ 307 റണ്‍സടിച്ചാണ് വിജയിച്ചത്.
അമ്പാട്ടി റായിഡു (100) സെഞ്ച്വറി നേടിയപ്പോള്‍ ധോണി (40 പന്തില്‍ 68), ശിഖര്‍ ധവാന്‍ (63), യുവരാജ് സിങ് (48 പന്തില്‍ 56) എന്നിവരും മികച്ചു നിന്നു. മറുപടി ബാറ്റിങിനിറങ്ങിയ ഇംഗ്ലണ്ടിനായി ബില്ലിങ്‌സ് (93), റോയ് (62), ബട്‌ലര്‍ (46), ഡേവ്‌സണ്‍ (41), ഹെയ്ല്‍സ് (40) എന്നിവര്‍ തിളങ്ങി. ഇന്ത്യക്കായി കുല്‍ദീപ് യാദവ് അഞ്ചു വിക്കറ്റുകള്‍ പിഴുതു. മറ്റൊരു ബൗളര്‍ക്കും കാര്യമായൊന്നും ചെയ്യാന്‍ സാധിച്ചില്ല.