മാനന്തവാടി: പത്ത് മാസത്തോളമായി അടഞ്ഞ് കിടക്കുന്ന മാനന്തവാടി പഴശ്ശിപാര്‍ക്ക് സന്ദര്‍ശകര്‍ക്കായി തുറന്ന് കൊടുക്കണമെന്ന ആവശ്യം ശക്തമാകുന്നു. 1994 ലാണ് വനം വകുപ്പ് സാമൂഹ്യ വനവല്‍ക്കരണ വിഭാഗംപാര്‍ക്ക് ആരംഭിച്ചത്. പിന്നീട് ഇത് ഡി.ടി.പി.സിക്ക് കൈമാറുകയായിരുന്നു.
നിരവധി പേരാണ് ഈ കാലയളവില്‍ പാര്‍ക്ക് സന്ദര്‍ശിക്കാനെത്തിയിരുന്നത്. അവധി ദിവസങ്ങളില്‍ 5000 രൂപ വരെ വരുമാനം ലഭിച്ചിരുന്നു. കുട്ടികള്‍ക്കുള്ള പാര്‍ക്ക്, ബോട്ട് സഫാരി, വാട്ടര്‍ ഫൗണ്ടയിന്‍ എന്നിവയെല്ലാം വിനോദസഞ്ചാരികളെ ഏറെ ആകര്‍ഷിച്ചിരുന്നു. പുഴയോട് ചേര്‍ന്നാണ് പാര്‍ക്ക് എന്നതിനാല്‍ തന്നെ ഇവിടം സന്ദര്‍ശിക്കാന്‍ എത്തുന്ന സഞ്ചാരികള്‍ക്കും വേറിട്ട അനുഭവമായി മാറിയിരുന്നു പാര്‍ക്ക്. ഇവിടുത്തെ പ്രധാന ആകര്‍ഷണമായിരുന്ന മുളങ്കൂട്ടങ്ങള്‍ നശിച്ച നിലയിലാണ്. പാര്‍ക്കിലുണ്ടായിരുന്ന വാട്ടര്‍ ഫൗണ്ടന്‍, കളിപ്പാട്ടങ്ങള്‍, പ്രതിമകള്‍ എന്നിവയെല്ലാം ഇന്ന് തീര്‍ത്തും ഉപയോഗശൂന്യമായ നിലയിലാണ്. പാര്‍ക്ക് നവീകരണത്തിന്റ ഭാഗമായി ഒരു കോടി രൂപയുടെ പദ്ധതിക്ക് അനുമതി ലഭിച്ച് പ്രവൃത്തികള്‍ ആരംഭിച്ചെങ്കിലും ജില്ലാ നിര്‍മ്മിതികേന്ദ്രയുടെ നേതൃത്വത്തില്‍ നടക്കുന്ന പ്രവര്‍ത്തികളും മന്ദഗതിയിലാണ്. ഇതും പാര്‍ക്ക് തുറക്കുന്നതിന് പ്രധാന തടസ്സമായിരിക്കുകയാണ്. ആദ്യഘട്ട പ്രവര്‍ത്തികള്‍ പൂര്‍ത്തീകരിച്ചെങ്കില്‍ അടുത്ത ഘട്ടത്തിലേക്കുള്ള ഫണ്ട് ലഭിക്കുകയുള്ളു.
എന്നാല്‍ പ്രവര്‍ത്തികള്‍ മന്ദഗതിയിലായതിനാല്‍ തന്നെ അടുത്ത ഘട്ട പ്രവര്‍ത്തികള്‍ക്കുള്ള പണം ലഭിക്കാത്ത സാഹചര്യമാണ് ഉള്ളത്. മാനന്തവാടിയിലെത്തുന്ന വിനോദ സഞ്ചാരികള്‍ക്കും പൊതുജനത്തിനും ഏറെ ഉപകാരപ്രദമായി മാറേണ്ട പാര്‍ക്ക് തുറന്ന് കൊടുക്കാന്‍ അടിയന്തിര നടപടികള്‍ ഉണ്ടാവണമെന്നാണ് ആവശ്യം ഉയരുന്നത്.