പേരാമ്പ്ര: മരുതേരി കനാല്‍ മുക്കില്‍ ചാത്തോത്ത് കുന്നുമ്മല്‍ കുളം വൃത്തിയാക്കി കുടുംബ കൂട്ടായ്മ നല്ല മാതൃകയൊരുക്കി. ഒരു കാലത്ത് നാടിന്റെ ആശ്രയമായിരുന്ന നിറയെ വെള്ളമുള്ള കുളം ഉടമകളും മറ്റും ശ്രദ്ധിക്കാത്തതിനാല്‍ കാടും പായലും നിറഞ്ഞ് നാശത്തിന്റെ വക്കിലായിരുന്നു. പ്രദേശത്ത് ജലക്ഷാമം തുടങ്ങിയതോടെ ചാത്തോത്ത് കുന്നുമ്മല്‍ കുടുംബാംഗങ്ങള്‍ ഉപയോഗിച്ചു വന്നിരുന്ന കുളത്തെ തേടി നാട്ടുകാര്‍ എത്തിയതോടെയാണ് ശുചീകരിക്കുകയെന്ന ആശയം രൂപപ്പെട്ടത്. തലമുറകള്‍ക്ക് ജലമേകിയ കുളം നവീകരിക്കാന്‍ കുടുംബത്തിലെ മക്കളും മരുമക്കളും സജീവമായി രംഗത്തിറങ്ങി. രാജന്‍, പ്രകാശന്‍, സത്യന്‍, ശാരദ, ഷിജു, ജേക്കബ്, ജിജോ, രാധ, രജിത എന്നിവരാണ് ശുചീകരണത്തിന് നേതൃത്വം നല്‍കിയത്.