ന്യൂഡല്‍ഹി: തമിഴ്‌നാട്ടില്‍ നടത്തുന്ന ജെല്ലിക്കെട്ട് നിരോധനം നീക്കാന്‍ കേന്ദ്ര സര്‍ക്കാര്‍ തയാറാകണമെന്ന ആവശ്യത്തിന് ഇക്കാര്യത്തില്‍ തങ്ങള്‍ തമിഴ്‌നാടിനൊപ്പമാണെന്ന് കേന്ദ്ര സര്‍ക്കാര്‍ അറിയിച്ചു. എന്നാല്‍ കേസ് സുപ്രിം കോടതിയിലായതിനാല്‍ ഇക്കാര്യത്തില്‍ തീരുമാനമെടുക്കാന്‍ കേന്ദ്രത്തിന് പരിമിതികളുണ്ടെന്നും കേന്ദ്ര പരിസ്ഥിതി മന്ത്രി അനില്‍ മാധവ് ദേവ് അറിയിച്ചു.
തമിഴ്‌നാട്ടിലെ വിവിധ രാഷ്ട്രീയ പാര്‍ട്ടികളും പ്രമുഖ വ്യക്തികളുമെല്ലാം ജെല്ലിക്കെട്ട് നിരോധനം നീക്കണമെന്ന് ആവശ്യപ്പെട്ടിരുന്നു. കൂടാതെ ലോക സഭാ ഡെപ്യൂട്ടി സ്പീക്കര്‍ എം.തമ്പിദുരൈ കേന്ദ്ര സര്‍ക്കാറില്‍ സമ്മര്‍ദ്ദം ചെലുത്തുകയും ചെയ്തിരുന്നു. ഈ സാഹചര്യത്തിലാണ് ജെല്ലിക്കെട്ട് വിഷയത്തില്‍ കേന്ദ്ര സര്‍ക്കാറിന് ഒരു തരത്തിലുള്ള എതിര്‍പ്പുമില്ലെന്ന് മന്ത്രി അറിയിച്ചത്.
കഴിഞ്ഞ യു.പി.എ സര്‍ക്കാറിന്റെ കാലത്താണ് ജെല്ലിക്കെട്ട് നിരോധിച്ചുകൊണ്ട് ഉത്തരവ് ഇറങ്ങിയിരുന്നത്. ഇക്കാര്യത്തില്‍ സുപ്രിം കോടതി വിധി വരുന്നതുവരെ കാത്തിരിക്കണമെന്നും കേന്ദ്ര സര്‍ക്കാര്‍ അറിയിച്ചു.