കല്‍പ്പറ്റ: മുസ്‌ലിം കള്‍ച്ചറല്‍ ഫൗണ്ടേഷന്‍( എം.സി.എഫ്) ചാരിറ്റബിള്‍ സൊസൈറ്റിക്കു കീഴില്‍ കല്‍പ്പറ്റ ബൈപ്പാസ് റോഡില്‍ പ്രവര്‍ത്തിക്കുന്ന അമല്‍ ഭവന്‍ ഗേള്‍സ് ഓര്‍ഫന്‍ കെയര്‍ ദശവാര്‍ഷികാഘോഷം നാളെ വൈകിട്ട് നാലിന് എം.സി.എഫ് ക്യാംപസില്‍ നടക്കും.
കല്‍പ്പറ്റ നിയുക്ത എം.എല്‍.എ സി.കെ ശശീന്ദ്രന്‍ ഉദ്ഘാടനം നിര്‍വഹിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. അമല്‍ ഭവന്‍ ഓര്‍ഫന്‍ കെയര്‍ പ്രസിഡന്റ് ആര്‍.പി.എം തങ്ങള്‍ അധ്യക്ഷനാകും. കല്‍പ്പറ്റ മുനിസിപ്പല്‍ ചെയര്‍മാന്‍ എ.പി ഹമീദ്, ഡോ. മുസ്തഫ ഫാറൂഖി, ഡോ. ജമാലുദ്ദീന്‍ ഫാറൂഖി, ജില്ലാ സാമൂഹിക നീതി ഓഫിസര്‍ വി.കെ രത്‌നസിങ്, നഗരസഭാ കൗണ്‍സിലര്‍ ഉമൈബ മൊയ്തീന്‍കുട്ടി, കെ.എന്‍.എം ജില്ലാ പ്രസിഡന്റ് പി.കെ പോക്കര്‍ ഫാറൂഖി, എം മുഹമ്മദ് എന്നിവര്‍ പങ്കെടുക്കും.
ടി.വി അബ്ദുള്‍ ഗഫൂര്‍ തിക്കോടി പ്രഭാഷണം നടത്തും. തുടര്‍ന്ന് കുട്ടികളുടെ സര്‍ഗവിരുന്ന് നടക്കും.
വാര്‍ത്താസമ്മേളനത്തില്‍ അമല്‍ ഭവന്‍ പ്രസിഡന്റ് ആര്‍.പി.എം. തങ്ങള്‍, സെക്രട്ടറി ഡോ. ജമാലുദ്ദീന്‍ ഫാറൂഖി, എം. മുഹമ്മദ്, കെ.പി. മുഹമ്മദ് എന്നിവര്‍ പങ്കെടുത്തു.