കോഴിക്കോട്: പരപ്പില്‍ എം.എം ഹൈസ്‌കൂളിലുണ്ടായ തീപിടിത്തത്തില്‍ വിദ്യാര്‍ഥികളുടെ പഠനസഹായ സാമഗ്രികളും ഫര്‍ണീച്ചറുകളും കത്തിനശിച്ചു. ഇന്നലെ വൈകിട്ട് അഞ്ചു മണിയോടെയാണ് തീപിടിത്തമുണ്ടായത്. വിദ്യാര്‍ഥികള്‍ നിര്‍മിച്ച പ്രവൃത്തി പരിചയ വസ്തുക്കള്‍ സൂക്ഷിക്കുന്ന മുറിയിലാണ് തീപിടിച്ചത്. തീപിടിത്തത്തില്‍ പഠന സാമഗ്രികള്‍ക്കു പുറമെ മൂന്നു ഡെസ്‌ക്, നാലു ബെഞ്ച്, രണ്ടു മേശ, സിലീങ് ഫാന്‍, ഓഡിയോ സിസ്റ്റം, ടി.വി എന്നിവയും കത്തിനശിച്ചു. തീപിടിത്തത്തിന്റെ കാരണം വ്യക്തമല്ല. ജനലിനരികിലെ ഡെസ്‌കില്‍ സൂക്ഷിച്ച സാമഗ്രികളാണ് കത്തിനശിച്ചത്. ബീച്ച് ഫയര്‍ഫോഴ്‌സ് സ്ഥലത്തെത്തി തീയണച്ചു.