മരങ്ങാട്ടുപിള്ളി : തരിശുസ്ഥലം സംയോജിത കൃഷിസ്ഥലമാക്കിയ മരങ്ങാട്ടുപിള്ളി ഗ്രാമപഞ്ചായത്തിലെ തൊഴിലുറപ്പു തൊഴിലാളികള്‍ക്ക് ഇത് വിളവെടുപ്പുകാലം. ഹരിതകേരളം പദ്ധതി ഉദ്ഘാടനത്തിനു മുമ്പു തന്നെ മഹാത്മാഗാന്ധി സര്‍വകലാശാലയുടെ മരങ്ങാട്ടുപിള്ളിയിലെ നഴ്‌സിങ് കോളജ് കോമ്പൗണ്ടിലെ തരിശുകിടന്ന രണ്ടര ഏക്കര്‍ സ്ഥലം യൂണിവേഴ്‌സിറ്റിയുടെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കൃഷി യോഗ്യമാക്കിയാണ് തൊഴിലുറപ്പു തൊഴിലാളികള്‍ സംയോജിത കൃഷി ആരംഭിച്ചത്.
തൊഴിലുറപ്പു പദ്ധതി പ്രകാരം കുറഞ്ഞത് അഞ്ചുവര്‍ഷമെങ്കിലും നിലനില്‍ക്കുന്ന ജോലികള്‍ നിര്‍ബന്ധമായതിനാല്‍ ഉഴവൂര്‍ ബ്ലോക്കിലെ വി.ഇ.ഒ ബിലാല്‍ റാമും മരങ്ങാട്ടുപിള്ളി ഗ്രാമപഞ്ചായത്തംഗം ജോണി നെല്ലരിയും മുന്‍കൈയെടുത്താണ് ദീര്‍ഘകാലം നിലനില്‍ക്കുന്ന കൃഷി എന്ന ആശയം തൊഴിലാളികള്‍ക്ക് നല്‍കി സംരംഭത്തിന് നേതൃത്വം നല്‍കിയത്. മരങ്ങാട്ടുപിള്ളി ഗ്രാമപഞ്ചായത്തിന്റെയും ഉഴവൂര്‍ ബ്ലോക്കിന്റെയും പിന്തുണകൂടിയായപ്പോള്‍ പദ്ധതി വിജയം കണ്ടു. വിളവെടുത്തു തുടങ്ങിയ പച്ചക്കറി കൃഷിക്കു പുറമെ സ്ഥലം ഏഴായി തിരിച്ച് വിവിധ കൃഷിരീതികള്‍ പരീക്ഷിക്കുകയാണിപ്പോള്‍.
കൃഷിസ്ഥലത്തിന്റെ ഒരു ഭാഗം തെങ്ങിന്‍തോപ്പാക്കി മാറ്റാനുള്ള ശ്രമത്തിലാണിപ്പോള്‍. മറ്റൊരു ഭാഗത്ത് നാഗാര്‍ജുന വൈദ്യശാലയില്‍ നിന്ന് ശേഖരിച്ച ഔഷധ സസ്യങ്ങള്‍ നട്ടുപിടിപ്പിച്ചിട്ടുണ്ട്. മധ്യഭാഗത്ത് ഇരിപ്പിടങ്ങള്‍ ഒരുക്കാന്‍ പാകത്തില്‍ തയ്യാറാക്കിയ നക്ഷത്രവനമാണ് മറ്റൊരു പ്രധാന ആകര്‍ഷണം. ഒരു ഭാഗത്ത് കപ്പത്തോട്ടവുമുണ്ട്.
കുടുംബശ്രീ തുടങ്ങി കൂടുതല്‍ പേരെ ഉള്‍പ്പെടുത്തി ഹരിത കേരളം പദ്ധതിയുടെ ഉദ്ദേശ ലക്ഷ്യങ്ങള്‍ക്കനുസരിച്ച് മാതൃകാ കൃഷിത്തോട്ടമാക്കി മാറ്റാനുള്ള ശ്രമത്തിലാണ് ഇപ്പോള്‍ മരങ്ങാട്ടുപിള്ളി ഗ്രാമപഞ്ചായത്തും ഉഴവൂര്‍ ബ്ലോക്കും.
ഇന്നലെ പച്ചക്കറി വിളവെടുപ്പുത്സവത്തില്‍ ബ്ലോക്ക് പഞ്ചായത്ത് പ്രസിഡന്റ് മോളി ലൂക്കോസ്, ഗ്രാമപഞ്ചായത്തു പ്രസിഡന്റ് ഡോ. റാണി ജോസഫ്, വൈസ്പ്രസിഡന്റ് മാത്തുക്കുട്ടി, സ്ഥിരംസമിതി അദ്ധ്യക്ഷന്‍ ജോണി നെല്ലരി, ബ്ലോക്ക് പഞ്ചായത്തംഗം നിര്‍മല ദിവാകരന്‍, എഡിസി (ജനറല്‍) പി.എസ്. ഷിനോ, ബ്ലോക്ക് ഡെവലപ്പ്‌മെന്റ് ഓഫീസര്‍ അജയന്‍ ഡി. ബാബു, ജോയിന്റ് ബിഡിഒമാരായ രാമന്‍കുട്ടി, എം.ഇ. ഷാജി, വി.ഇ.ഒ ബിലാല്‍ കെ. രാം, തൊഴിലുറപ്പ് പദ്ധതി എഞ്ചിനീയര്‍ ലക്ഷ്മി വിജയന്‍ തുടങ്ങിയവര്‍ പങ്കെടുത്തു.