പുത്തനത്താണി: ഗൃഹനാഥനെ അന്വേഷിച്ചെത്തിയ ആള്‍ പട്ടാപ്പകല്‍ വീട്ടില്‍നിന്നു യുവതിയുടെ മാല കവര്‍ന്നു. ക്ലാരി ചെനക്കലിലെ ചീരംകുളംങ്ങര സിദ്ദീഖിന്റെ ഭാര്യയുടെ നാല് പവന്‍ വരുന്ന സ്വര്‍ണമാലയാണ് നഷ്ടപ്പെട്ടത്.
കഴിഞ്ഞ ദിവസം ബൈക്കില്‍ വീട്ടില്‍വന്ന വ്യക്തി സിദ്ദീഖിനെ ചോദിച്ച് അടുക്കള വാതിലിനടുത്തു വരികയും സിദ്ദീഖിന്റെ ഭാര്യയുടെ കഴുത്തിലണിഞ്ഞ മാല പിടിച്ചുറിച്ചു രക്ഷപ്പെടുകയുമായിരുന്നു. മാല പിടിച്ചുപറിക്കുന്നതിനിടയില്‍ തടയാന്‍ ശ്രമിച്ച യുവതിയുടെ കൈക്ക് മോഷ്ടാവിന്റെ കടിയേറ്റു. യുവതി വളവന്നൂര്‍ കമ്മ്യൂണിറ്റി ഹെല്‍ത്ത് സെന്ററില്‍ പ്രാഥമിക ചികിത്സ തേടി. കല്‍പകഞ്ചേരി പൊലിസ് കേസെടുത്ത് അന്വേഷണമാരംഭിച്ചു.