കാട്ടിക്കുളം: കര്‍ണാടകയില്‍ നിന്നും കാറില്‍ മദ്യം കടത്താന്‍ ശ്രമിച്ചയാളെ തോല്‍പ്പെട്ടിയില്‍ വാഹനപരിശോധനക്കിടെ എക്‌സൈസ് സംഘം പടികൂടി. ബുധനാഴ്ച രാത്രി എട്ടോടെയാണ് കാറില്‍ കടത്താന്‍ ശ്രമിച്ച കര്‍ണാടക മദ്യം പിടികൂടിയത്. ഇതുമായ് ബന്ധപ്പെട്ട് കാട്ടിക്കുളം വയല്‍ക്കര ഉടുമ്പനാട്ട് യു.ആര്‍ രാജേഷിനെയാണ് എക്‌സൈസ് അറസ്റ്റ് ചെയ്തത്. 13 ലിറ്റര്‍ കര്‍ണാടക മദ്യം കാറില്‍ ഒളിപ്പിച്ച നിലയിലായിരുന്നു.
മദ്യം കടത്തിയ കാറും അധികൃതര്‍ കസ്റ്റഡിയിലെടുത്തിട്ടുണ്ട്. എക്‌സൈസ് സിവില്‍ ഓഫിസര്‍മാരായ എം സോമന്‍, സി സുരേഷ്, ബഷീര്‍ എന്നിവരുടെ നേതൃത്വത്തിലായിരുന്നു പരിശോധന നടത്തിയത്. കസ്റ്റഡിയിലെടുത്ത വാഹനവും മദ്യവും, പ്രതിയേയും മാനന്തവാടി എക്‌സൈസ് റെയ്ഞ്ചിന് കൈമാറി. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു. വാഹനം എക്‌സൈസ് വകുപ്പ് കണ്ടുകെട്ടി.