കോഴിക്കോട്: വലിയങ്ങാടി കൊപ്ര ബസാറില്‍ തീപിടിത്തം. ബുധനാഴ്ച രാത്രി 12.30ഓടെയാണ് സംഭവം. പാണ്ട്യാല ചേവില്‍ സൂക്ഷിച്ചിരുന്ന 80 കൊപ്ര ചാക്കുകള്‍ പൂര്‍ണമായും കത്തിനശിച്ചു. രാത്രി വൈകിയതിനാല്‍ തൊഴിലാളികളാരും സ്ഥലുത്തുണ്ടായിരുന്നില്ല.
വടകര സ്വദേശി അക്ബറിന്റെ ഉടമസ്ഥതയിലുള്ള ഷാ എക്‌സ്‌പോര്‍ട്ട് എന്ന ഗോഡൗണിനാണ് തീപിടിച്ചത്. പുക ഉയരുന്നത് ശ്രദ്ധയില്‍പ്പെട്ട തൊട്ടടുത്ത കെട്ടിടത്തില്‍ താമസിക്കുന്നവര്‍ അഗ്നിശമന സേനയെ വിവരമറിയിക്കുകയായിരുന്നു.
ബീച്ച്, വെള്ളിമാട്കുന്ന്, മുക്കം, നരിക്കുനി, വടകര മീഞ്ചന്ത എന്നിവിടങ്ങളില്‍ നിന്ന് ഏഴു യൂനിറ്റ് ഫയര്‍ഫോഴ്‌സ് എത്തിയാണ് തീയണച്ചത്. ശക്തമായ തീയും പുകയും രക്ഷാപ്രവര്‍ത്തനങ്ങള്‍ക്ക് ബുദ്ധിമുട്ടായി. ഗോഡൗണിലേക്കുള്ള വഴി ഇടുങ്ങിയതായതിനാല്‍ ഇവിടേക്ക് വെള്ളമെത്തിക്കാനും പ്രയാസം നേരിട്ടു. ബീച്ച് സ്റ്റേഷന്‍ ഓഫിസര്‍ കെ.എം ജോമി, അസി. സ്റ്റേഷന്‍ ഓഫിസര്‍ വി.കെ ബിജു, മീഞ്ചന്ത ഫയര്‍ സ്റ്റേഷന്‍ ഓഫിസര്‍ അജിത്ത് എന്നിവരുടെ മേല്‍നോട്ടത്തില്‍ മൂന്നര മണിക്കൂര്‍ കഠിന പരിശ്രമത്തിനൊടുവിലാണ് തീയണച്ചത്. സംഭവത്തില്‍ നാലുലക്ഷം രൂപയുടെ നാശനഷ്ടം കണക്കാക്കുന്നു.