കാളികാവ്: നിലമ്പൂര്‍ വനമേഖലയിലെ ഉള്‍ക്കാട്ടില്‍ തിരച്ചിലിനുപോയ തണ്ടര്‍ബോള്‍ട്ട് മൂന്നു ദിവസത്തിനു ശേഷം തിരിച്ചിറങ്ങി. ഉള്‍ക്കാട്ടില്‍ തണ്ടര്‍ബോള്‍ട്ടിന്റെ നേതൃത്വത്തിലാണ് തിരച്ചില്‍ നടത്തിയത്.
മാവോയിസ്റ്റ് സംഘം കാട്ടില്‍തന്നെയുണ്ടെന്ന സൂചന ലഭിച്ചതിനെ തുടര്‍ന്നാണ് തിരച്ചില്‍ നടത്തിയത്. തിങ്കളാഴ്ച കാട്ടിനുള്ളില്‍ കയറി തിരച്ചില്‍ നടത്തിയ സംഘം ബുധനാഴ്ച രാത്രിയാണ് തിരിച്ചെത്തിയത്. നെടുങ്കയം വനമേഖലയിലൂടെയാണ് സംഘം ഉള്‍ക്കാട്ടിലേക്ക് പ്രവേശിച്ചത്. മാവോയിസ്റ്റ്-പൊലിസ് ഏറ്റുമുട്ടല്‍ നടന്ന കരുളായി വരയന്‍ മലയോട് ചേര്‍ന്ന കാടുകളിലാണ് തണ്ടര്‍ബോള്‍ട്ട് തിരച്ചില്‍ നടത്തിയത്.
പൊലിസിനെ പൂര്‍ണമായും ഒഴിവാക്കിയാണ് തണ്ടര്‍ബോള്‍ട്ടിന്റെ നീക്കം. വെടിയുതിര്‍ത്താല്‍ തിരിച്ചു വെടിവയ്ക്കാനാണ് സേനയുടെ തീരുമാനം. പിടികൂടാന്‍ പറ്റിയാല്‍ അതിനു ശ്രമിക്കുമെന്നും ബന്ധപ്പെട്ടവര്‍ പറഞ്ഞു. ഒരു അസിസ്റ്റന്റ് കമ്മിഷണറുടെ നേതൃത്വത്തിലായിരുന്നു തിരച്ചില്‍.