മട്ടാഞ്ചേരി: കൊച്ചിയിലെത്തുന്ന ലക്ഷദ്വീപ്കാര്‍ക്കു വില്‍പ്പന നടത്തുന്നതിനായി എത്തിച്ച കഞ്ചാവുമായി യുവാവ് തോപ്പുംപടി പൊലിസിന്റെ പിടിയിലായി. പള്ളുരുത്തി കച്ചേരിപ്പടി ആശുപത്രിക്കു സമീപം അന്‍ഷാദ്(25)നെയാണു മട്ടാഞ്ചേരി അസി.കമ്മീഷ്ണര്‍ കെ.എന്‍ അനിരുദ്ധന്‍, തോപ്പുംപടി എസ്.ഐ സി ബിനു എന്നിവരുടെ നേതൃത്വത്തില്‍ മുണ്ടംവേലി പള്ളിക്കു പിറകുവശത്തുനിന്ന് അറസ്റ്റ് ചെയ്തത്.
ഇയാളുടെ കൈവശമുണ്ടായിരുന്ന ബാഗില്‍ സൂക്ഷിച്ചിരുന്ന ഒരു കിലോ നൂറ് ഗ്രാം തൂക്കം വരുന്ന കഞ്ചാവും പൊലിസ് പിടിച്ചെടുത്തു.
ലക്ഷദ്വീപ്കാര്‍ക്കു കഞ്ചാവ് വില്‍പ്പന നടത്തുന്ന വലിയ സംഘം കൊച്ചിയില്‍ പ്രവര്‍ത്തിക്കുന്നുണ്ടെന്നു മട്ടാഞ്ചേരി അസി.കമ്മീഷ്ണര്‍ക്ക് കിട്ടിയ രഹസ്യ വിവരം ലഭിച്ചതിനെ തുടര്‍ന്നു കഞ്ചാവ് ഉപയോഗിക്കുന്ന ലക്ഷദ്വീപുകാരെ ചോദ്യം ചെയ്തതില്‍ നിന്നാണു പ്രതിയെ സംബന്ധിച്ച വിവരം ലഭിച്ചത്. പിന്നീട് ആവശ്യക്കാരാണെന്ന വ്യാജേന മീന്‍ വില്‍പ്പനക്കാരുടെ വേഷത്തില്‍ പൊലിസ് ഇയാളെ ഫോണില്‍ വിളിച്ച് വരുത്തി അറസ്റ്റ് ചെയ്യുകയായിരുന്നു.
തമിഴ്‌നാട്ടില്‍ നിന്ന് കിലോ പതിനായിരം രൂപക്ക് വാങ്ങി ഇയാള്‍ ഒന്നേകാല്‍ ലക്ഷം രൂപക്കാണു ലക്ഷദ്വീപുകാര്‍ക്ക് വില്‍ക്കുന്നതെന്നു പൊലിസ് പറഞ്ഞു.കൊച്ചിയിലെത്തുന്ന ലക്ഷദ്വീപുകാര്‍ക്ക് കഞ്ചാവ് എത്തിക്കുന്ന വലിയ സംഘം കൊച്ചി കേന്ദ്രീകരിച്ച് പ്രവര്‍ത്തിക്കുന്നുണ്ടെന്നു പിടിയിലായ അന്‍ഷാദ് പൊലിസിനോട് പറഞ്ഞു. ഇയാള്‍ സംഘത്തിലെ ഒരു ചെറിയ കണ്ണി മാത്രമാണെന്നും പൊലിസ് വ്യക്തമാക്കി.ഇത്തരക്കാരെ പിടികൂടാന്‍ പ്രത്യേക സ്‌ക്വാഡിനെ നിയോഗിച്ചിട്ടുണ്ട്.
കൊച്ചി തഹസില്‍ദാര്‍ ബീഗം താഹിറയുടെ സാന്നിദ്ധ്യത്തിലായിരുന്നു പരിശോധന.ഗ്രേഡ് എസ്.ഐമാരായ കെ.പി ജബ്ബാര്‍, തങ്കച്ചന്‍, എ.എസ്.ഐ ജയകുമാര്‍,സിവില്‍ പൊലിസ് ഓഫിസര്‍മാരായ ദിലീപ്,പ്രകാശ്,സജീവ്,ജയന്‍ എന്നിവരും പ്രതിയെ പിടികൂടിയ സംഘത്തിലുണ്ടായിരുന്നു. ഒരു മാസത്തിനിടെ തോപ്പുംപടി പൊലിസ് സ്റ്റേഷന്‍ പരിധിയില്‍ നിന്ന് രണ്ടര കിലോ കഞ്ചാവാണ് പൊലിസ് പിടികൂടിയത്.പ്രതിയെ ഇന്ന് കോടതിയില്‍ ഹാജരാക്കും.