മാഡ്രിഡ്: സ്പാനിഷ് കോപ്പ ഡെല്‍ റേയില്‍ വമ്പന്‍മാരായ റയല്‍ മാഡ്രിഡ് ക്വാര്‍ട്ടറില്‍ കടന്നു. രണ്ടാം പാദ പ്രീ ക്വാര്‍ട്ടറില്‍ സെവിയ്യയോട് 3-3ന് സമനില വഴങ്ങിയെങ്കിലും ഇരുപാദങ്ങളിലുമായി 6-3 എന്ന സ്‌കോറിനാണ് റയല്‍ ക്വാര്‍ട്ടറിലേക്ക് മുന്നേറിയത്.  പരാജയമറിയാതെ റയലിന്റെ 40ാം മത്സരം കൂടിയായിരുന്നു ഇത്. നേരത്തെ ബാഴ്‌സലോണ മാത്രമാണ് ഈ റെക്കോര്‍ഡ് സ്വന്തമാക്കിയത്.
സെവിയ്യയുടെ തട്ടകത്തില്‍ നടന്ന മത്സരത്തില്‍ ഇരുടീമുകളും ഇഞ്ചോടിഞ്ച് പോരാട്ടമാണ് കാഴ്ച്ചവച്ചത്. ക്രിസ്റ്റ്യാനോ റൊണാള്‍ഡോ, ലൂക്കാ മോഡ്രിച്ച് എന്നിവര്‍ ടീമിലുണ്ടായിരുന്നില്ല. ക്രിസ്റ്റ്യാനോയ്ക്ക് പകരം കരീം ബെന്‍സേമയാണ് ആക്രമണത്തിന് ചുക്കാന്‍ പിടിച്ചത്. തുടക്കത്തില്‍ തന്നെ റയല്‍ മുന്നിലെത്തുമെന്ന് കരുതിയെങ്കിലും അപ്രതീക്ഷിതമായി സെവിയ്യ മുന്നിലെത്തി. 10ാം മിനുട്ടില്‍ സെവിയ്യയുടെ നീക്കങ്ങള്‍ പ്രതിരോധിക്കുന്നതിനിടെ ഡാനിലോ സെല്‍ഫ് ഗോള്‍ വഴങ്ങി. ഇതോടെ സെവിയ്യ മുന്നിലെത്തി. തിരിച്ചടിക്കാന്‍ ടീം ശ്രമിച്ചെങ്കിലും ആദ്യ പകുതിയില്‍ സമനില പിടിക്കാന്‍ സാധിച്ചില്ല.
രണ്ടാം പകുതിയില്‍ സെവിയ്യ തുടര്‍ച്ചയായി ആക്രമിച്ച് കളിച്ചതോടെ റയല്‍ സമ്മര്‍ദത്തിലായി. എന്നാല്‍ 48ാം മിനുട്ടില്‍ ടീം സമനില ഗോള്‍ നേടി. മാര്‍ക്കോ അസെന്‍സിയോ ആയിരുന്നു സ്‌കോറര്‍. തകര്‍പ്പന്‍ മുന്നേറ്റത്തിലായിരുന്നു താരം സ്‌കോര്‍ ചെയ്തത്.
എന്നാല്‍ നാലു മിനുട്ട് മാത്രമേ ഇതിന് ആയുസ്സുണ്ടായിരുന്നുള്ളൂ. 53ാം മിനുട്ടില്‍ സ്റ്റീവന്‍ ജൊവാട്ടിച്ച് സെവിയ്യയെ മുന്നിലെത്തിച്ചു. 77ാം മിനുട്ടില്‍ ഇബോറ കൂടി സ്‌കോര്‍ ചെയ്തതോടെ സെവിയ്യ ജയം സ്വന്തമാക്കുമെന്ന് കരുതി. 83ാം മിനുട്ടില്‍ സെര്‍ജിയോ റാമോസും, കളി തീരാന്‍ മിനുട്ടുകള്‍ മാത്രം ശേഷിക്കെ ബെന്‍സേമയും സ്‌കോര്‍ ചെയ്തതോടെ അപ്രതീക്ഷിതമായി സമനില പിടിക്കുകയായിരുന്നു റയല്‍.