മംഗളൂരു: നക്ഷത്ര ഹോട്ടല്‍ കേന്ദ്രീകരിച്ചു ഓണ്‍ലൈന്‍ പെണ്‍വാണിഭം നടത്തി വരികയായിരുന്ന സംഘം പോലിസ് പിടിയില്‍. കാസര്‍കോട് സ്വദേശിയടക്കം മൂന്നു പേരെയാണ് പൊലിസ് അറസ്റ്റു ചെയ്തത്. ഇവരില്‍നിന്ന് എട്ടു മൊബൈല്‍ ഫോണുകളും രണ്ട് കാറുകളും 67,000 രൂപയും പൊലിസ് പിടിച്ചെടുത്തു.
മഞ്ചേശ്വരത്തെ പ്രീതം(30), കര്‍ണാടക തെങ്ക ഗുരുപുരത്തെ സുനില്‍(22), കര്‍ണാടക ഹനഗലിലെ നാഗരാജ്(22) എന്നിവരാണ് മംഗളൂരു പൊലിസിന്റെ കസ്റ്റഡിയിലായത്. ഇവരുടെ സംഘത്തിലുണ്ടായിരുന്ന രണ്ടു പെണ്‍കുട്ടികളെ പൊലിസ് രക്ഷപ്പെടുത്തി. വെബ്‌സൈറ്റില്‍ ഫോണ്‍നമ്പരും മറ്റു വിവരങ്ങളും അടങ്ങിയ പരസ്യങ്ങളിലൂടെയാണു പെണ്‍വാണിഭ സംഘം ഇടപാടുകാരെ സംഘടിപ്പിച്ചിരുന്നത്. മംഗളൂരുവിലെ ഹോസ്റ്റലുകളില്‍ താമസിക്കുന്ന മലയാളി പെണ്‍കുട്ടികളെയടക്കം സംഘം പ്രലോഭിപ്പിച്ചു നക്ഷത്രഹോട്ടലിലെത്തിച്ചു പ്രമുഖര്‍ക്ക് കാഴ്ചവച്ചിരുന്നതായി പൊലിസ് അന്വേഷണത്തില്‍ വ്യക്തമായി.