കാട്ടാക്കട: മംഗലക്കല്‍ കടയറവിള പുത്തന്‍ വീട്ടില്‍ രാജേഷിന്റെ വീട്ടില്‍ അതിക്രമിച്ചു കയറുകയും മുളകുപൊടി വിതറി അക്രമം നടത്തുകയും ചെയ്ത പ്രതികളെ കാട്ടാക്കട പൊലിസ് അറസ്റ്റ് ചെയ്തു.
മംഗലക്കല്‍ പറണ്ടോട് അരുണ്‍ ഭവനില്‍ അരുണ്‍ മോഹന്‍ (26), കിഴമച്ചല്‍ കാരിഞ്ചല്‍ ചരുവിളാകത്ത് വീട്ടില്‍ ജാങ്കോ എന്ന അരവിന്ദ് (21 ), പലക്കല്‍ കിഴമച്ചല്‍ നടുവിള പുത്തന്‍ വീട്ടില്‍ ഉണ്ണി എന്ന രാഹുല്‍ (20) എന്നിവരാണ് പിടിയിലായത്. സംഭവത്തെ കുറിച്ച് പൊലിസ് പറയുന്നത് ഇങ്ങനെ: അരുണും രാജേഷും മംഗലക്കല്‍ ജങ്ഷനില്‍ വച്ചുണ്ടായ വാക്കുതര്‍ക്കമാണ് രാജേഷിന്റെ വീട് കയറി ആക്രമണത്തില്‍ കലാശിച്ചത്.സംഭവ ദിവസം അരവിന്ദ് കാനക്കോട് നിന്നും മുളകുപൊടി വാങ്ങുകയും സുഹൃത്തിന്റെ വിവാഹത്തില്‍ പങ്കെടുക്കാന്‍ പോകാന്‍ എന്ന് പറഞ്ഞു നക്രാം ചിറയില്‍ നിന്നും സ്‌കോര്‍പ്പിയോ വാഹനം സംഘടിപ്പിച്ച് പകല്‍ സമയത്ത് എത്തിയാണ് ആക്രമണം നടത്തിയത്. വിഷ്ണു ആണ് വാഹനം ഓടിച്ചിരുന്നത്. മുഖം മൂടി ധരിച്ചെത്തിയ സംഘം രാജേഷ് വീട്ടില്‍ ഉണ്ടെന്നു ഉറപ്പിക്കുന്നതിനായി രാജേഷിന്റെ പേര് ചോദിച്ചു രാഹുല്‍ വീട്ടില്‍ എത്തുകയും ചെയ്തു. രാജേഷ് ഉണ്ടെന്നു ഉറപ്പു വരുത്തിയ സംഘം ചികിത്സയെ തുടര്‍ന്ന് വിശ്രമത്തില്‍ ആയിരുന്ന രാജേഷിനെ ആക്രമിച്ചു.
രാജേഷിന്റെ മുഖത്ത് മുളകുപൊടി വിതറുകയും കമ്പി വടി കൊണ്ട് മര്‍ദിക്കുകയും ചെയ്തു. നിലവിളി കേട്ട് ഓടി എത്തിയ രാജേഷിന്റെ മാതാ പിതാക്കളെയും മുളക് പൊടി എറിഞ്ഞ ശേഷം റോഡില്‍ നിറുത്തിയിരുന്ന കാറില്‍ കയറി സംഘം രക്ഷപ്പെടുകയായിരുന്നു. സംഭവശേഷം ഒളിവില്‍
പോയ പ്രതികളെ കാട്ടാക്കട പൊലിസ് വ്യക്തമായ നിരീക്ഷണത്തിലൂടെ വലയിലാക്കുകയായിരുന്നു.
അക്രമത്തിനു ഉപയോഗിച്ച വസ്തുകള്‍ അരുണിന്റെ വീട്ടില്‍ നിന്നും പൊലിസ് കണ്ടെടുത്തു. കാട്ടാക്കട കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.