ബെയിജിങ്: ദക്ഷിണ കൊറിയയില്‍ മിസൈല്‍ പ്രതിരോധ കവചം സ്ഥാപിക്കാനുള്ള അമേരിക്കന്‍ നീക്കത്തിനെതിരെ യോജിച്ചു നീങ്ങാന്‍ ചൈനയും റഷ്യയും ധാരണയിലെത്തിയതായി ചൈനീസ് ഔദ്യോഗിക വാര്‍ത്താ ഏജന്‍സിയായ സിന്‍ഹുവ റിപ്പോര്‍ട്ട് ചെയ്തു. അമേരിക്കയും ദക്ഷിണ കൊറിയയും ഇക്കാര്യത്തില്‍ ചര്‍ച്ച നടത്തിയതിനോടുള്ള പ്രതികരണമായി ചൈനയും റഷ്യയും മേഖലയില്‍ സംയുക്ത സൈനികാഭ്യാസം സംഘടിപ്പിച്ചിരുന്നു. ഉത്തര കൊറിയയില്‍നിന്നുള്ള ആണവായുധം ഉള്‍പ്പെടെയുള്ള ഭീഷണി പ്രതിരോധിക്കുന്നതിനായാണ് ദക്ഷിണ കൊറിയ യു.എസ് മിസൈല്‍ പ്രതിരോധ കവചം സ്ഥാപിക്കാന്‍ തീരുമാനിച്ചത്.