എരുമപ്പെട്ടി: കേരളത്തിന്റെ മണവും രുചിയുമുള്ള പച്ചക്കറികള്‍ മരുഭൂമിയിലും വിളയിക്കാന്‍ കഴിയുമെന്ന് തെളിയിച്ചിരിക്കുകയാണ് പ്രവാസിയായ എരുമപ്പെട്ടി കരിയന്നൂര്‍ കേളംപുലാക്കല്‍ നൗഷാദ്. എന്തും വില കൊടുത്ത് വാങ്ങുന്ന സംസ്‌കാരത്തിന് അടിമകളായ മലയാളികള്‍ പ്രവാസിയായ ഈ യുവാവിന്റെ പ്രവര്‍ത്തനം മാതൃകയാക്കേണ്ടതാണ്.
ഷാര്‍ജയിലുള്ള ഓയില്‍ കമ്പനിയിലെ ജീവനക്കാരനായ നൗഷാദ് തന്റെ വില്ലയോട് ചേര്‍ന്നുള്ള സ്ഥലത്ത് നാല് വര്‍ഷം മുമ്പാണ് പച്ചക്കറി കൃഷി ചെയ്യാന്‍ ആരംഭിച്ചത്. ലീവിന് നാട്ടില്‍ വന്നപ്പോള്‍ കൊണ്ട് വന്ന വിത്തുകളാണ് കൃഷിക്ക് ഉപയോഗിച്ചത്. ഇപ്പോള്‍ നൗഷാദിന്റെ തോട്ടത്തില്‍ വെണ്ട, വെള്ളരി, വഴുതന,തക്കാളി, പാവയ്ക്ക, പടവലം, പയര്‍, കുമ്പളവും, കോവയ്ക്ക, ചീര, ചീനമുളക് എന്നിവ സമൃദ്ധിയായി വിളഞ്ഞ് കിടക്കുകയാണ്. തീര്‍ത്തും ജൈവ രീതിയില്‍ ചെയ്യുന്ന കൃഷിക്ക് ആട്ടിന്‍കാട്ടമാണ് വളമായി ഉപയോഗിക്കുന്നത്. അതിരാവിലേയും ജോലി കഴിഞ്ഞെത്തുന്ന സമയവും അവധി ദിനങ്ങളുമാണ് നൗഷാദ് കൃഷി പരിപാലനത്തിനായി മാറ്റി വെക്കുന്നത്. കൂടെ താമസിക്കുന്ന കാസര്‍ക്കോട് സ്വദേശി വിശ്വനാഥനും നൗഷാദിനെ കൃഷിയില്‍ സഹായിക്കാറുണ്ട്.
ആവശ്യത്തിലധികം കായ്കറികള്‍ 'സമീപ വില്ലകളിലുള്ള മലയാളികള്‍ക്കും സൗജന്യമായി ഇവ വിതരണം ചെയ്യാറുണ്ട്. വിഷരഹിതമായ പച്ചക്കറികള്‍ ഗള്‍ഫ് മാര്‍ക്കറ്റുകളില്‍ ലഭിക്കുമെങ്കിലും സ്വന്തം അധ്വാനത്തില്‍ വിളയിച്ചെടുത്ത കായ്കറികള്‍ പ്രത്യേക രുചിയാണ് സമ്മാനിക്കുന്നതെന്ന് നൗഷാദ് അഭിപ്രായപ്പെടുന്നു.
വിരസതയകറ്റാനും ജോലി ഭാരം കൊണ്ടുള്ള മാനസിക സമ്മര്‍ദ്ധം കുറയ്ക്കാനും ശാരീരിക വ്യായാമത്തിനും കൃഷി ഒരു ഉത്തമ മാര്‍ഗമാണെന്നും ഈ യുവാവ് അവകാശപ്പെടുന്നു. അടുപ്പ് പുകയ്ക്കുന്നതിന് അയല്‍ സംസ്ഥാനങ്ങളിലെ വിഷലിപ്തമായ പച്ചക്കറിക്കായി കാത്ത് നില്‍ക്കുന്ന മലയാളികള്‍ക്ക് അനുകരിക്കാവുന്ന മാതൃകയാണ് മണലാരണ്യത്തിലെ പ്രതികൂല കാലാവസ്ഥയില്‍ അടുക്കളത്തോട്ടം നിര്‍മിച്ച് തനിക്കാവശ്യമുള്ള പച്ചക്കറികള്‍ ഉല്‍പാദിപ്പിക്കുന്ന നൗഷാദ്.