ശ്രീകാര്യം: ഉറങ്ങിക്കിടന്നിരുന്ന ഭാര്യയെ ഇലക്ട്രിക് വയര്‍ കഴുത്തില്‍ കുരുക്കിയ ശേഷം ബ്ലേഡ് കൊണ്ട് കഴുത്ത് മുറിച്ച് കൊല്ലാന്‍ ഭര്‍ത്താവ് ശ്രമിച്ചതായി പരാതി. വലിയവേളി സ്വദേശി ചെറുപുഷ്പം(40) ആണ് ഇതുസംബന്ധിച്ച് പൊലിസില്‍ പരാതി നല്‍കിയത്.
മേയ് 16 ന് പുലര്‍ച്ചെ രണ്ട് മണിയോടെ ആയിരുന്നു സംഭവം. ഉറങ്ങിക്കിടക്കുകയായിരുന്ന ചെറുപുഷ്പത്തിന്റെ കഴുത്തില്‍ ഭര്‍ത്താവ് ജോയിസണ്‍(46) വയര്‍കൊണ്ട് ചുറ്റിയശേഷം ബ്ലേഡ് കൊണ്ട് കഴുത്തു മുറിച്ചു എന്നാണ് പരാതിയില്‍ പറയുന്നത്. നിലവിളികേട്ട് നാട്ടുകാര്‍ ഓടിയെത്തിയപ്പോഴേക്കും ജോയിസണ്‍ രക്ഷപ്പെട്ടിരുന്നു. ആശുപത്രിയില്‍ എത്തിച്ച ചെറുപുഷ്പം ചികിത്സ കഴിഞ്ഞ് ചൊവ്വാഴ്ച രാത്രി മടങ്ങിയെത്തി പരാതി നല്‍കുകയായിരുന്നു. പൊലിസ് കേസെടുത്ത് അന്വേഷണമാരംഭിച്ചു.