കൊണ്ടോട്ടി: കലാകാരന്‍മാര്‍ വരച്ച ചിത്രങ്ങള്‍ക്കു പ്രകൃതിഭാവനയില്‍ ചുമരുമായി കരിപ്പൂര്‍ വിമാനത്താവളത്തില്‍ ആര്‍ട്ട് ഗാലറിയൊരുങ്ങുന്നു. മരച്ചില്ലകളുടെ ചെറിയ ഭാഗങ്ങള്‍ ചേര്‍ത്തുവച്ച് ഒരുക്കിയ ഗാലറിയുടെ ചുമരും തൂണുകളും കലാകാരന്റെ സൃഷ്ടികള്‍ക്കു മിഴിവേകുന്ന രീതിയിലാണ് അണിയിച്ചൊരുക്കിയിരിക്കുന്നത്.
സൃഷ്ടികള്‍ വില്‍പന നടത്തുന്നതിനും പ്രദര്‍ശിപ്പിക്കുന്നതിനുമായാണ് വിമാനത്താവള അതോറിറ്റി ആര്‍ട്ട് ഗാലറി നിര്‍മിക്കുന്നത്. അന്താരാഷ്ട്ര ടെര്‍മിനലില്‍ കസ്റ്റംസ് ഹാളിനോട് ചേര്‍ന്നുള്ള ഭാഗത്താണ് ആര്‍ട്ട് ഗാലറി. ഇവിടെ വില്‍ക്കപ്പെടുന്ന ചിത്രങ്ങള്‍ക്കു ലഭിക്കുന്ന തുകയുടെ 10 ശതമാനം അതോറിറ്റി വാടകയായി ഈടാക്കും. കഴിഞ്ഞ വര്‍ഷം എയര്‍പോര്‍ട്ട് അതോറിറ്റി കേന്ദ്ര കാര്യാലയമാണ് രാജ്യത്തെ വിമാനത്താവളങ്ങളില്‍ ആര്‍ട്ട് ഗാലറിയൊരുക്കാന്‍ നിര്‍ദേശം നല്‍കിയിരുന്നത്.
കരിപ്പൂരില്‍ വന്നിറങ്ങുന്ന ടൂറിസ്റ്റുകളെ കേരളീയ കലാകാരന്‍മാരുടെ ചിത്രങ്ങള്‍ ആകര്‍ഷിപ്പിക്കുകയാണ് ഗാലറിയുടെ ലക്ഷ്യം.