തിരൂരങ്ങാടി: കൊടിഞ്ഞി പുല്ലാണി ഫൈസല്‍ വധത്തില്‍ എസ്.പിക്കെതിരേ രൂക്ഷ വിമര്‍ശനവുമായി സ്ഥലം എം.എല്‍.എ പി.കെ അബ്ദുറബ്ബ്. ഫൈസല്‍ വധക്കേസ് അന്വേഷണം എസ്.പിയുടെ നേതൃത്വത്തില്‍ വഴിതിരിച്ചുവിടാനുള്ള ഗൂഢശ്രമങ്ങള്‍ നടക്കുന്നതായി സംശയിക്കുന്നതായി ചെമ്മാട് റസ്റ്റ് ഹൗസില്‍ വിളിച്ചുചേര്‍ത്ത വാര്‍ത്താസമ്മേളനത്തില്‍ അദ്ദേഹം ആരോപിച്ചു.
അന്വേഷണത്തലവന്‍ താനാണെന്നു പറയുന്നെന്നല്ലാതെ കോളിളക്കം സൃഷ്ടിച്ച ഒരു കൊലപാതകത്തില്‍ നിരുത്തരവാദപരമായ സമീപനമാണ് എസ്.പി സ്വീകരിച്ചുവരുന്നത്. കൃത്യം നടത്തിയവരും ഗൂഢാലോചനയില്‍ പങ്കെടുത്തവരുമായ പ്രതികളെ ഇനിയും പിടികൂടാന്‍ ബാക്കിയുണ്ടെന്നും പ്രതികള്‍ നാടുവിട്ടെന്ന് അന്വേഷണ സംഘം പറയുമ്പോഴും അവര്‍ നാട്ടില്‍ വിലസുന്നതായാണ് വിവരമെന്നും എം.എല്‍.എ പറഞ്ഞു.
ഗൂഢാലോചനാ കേന്ദ്രത്തിനെതിരേയും നടപടിയെടുക്കാന്‍ പൊലിസ് തയാറായിട്ടില്ല. പകരം ഡിവൈ.എസ്.പി അടക്കമുള്ള അന്വേഷണ സംഘത്തെ മറ്റു ഡ്യൂട്ടികളില്‍ നിയോഗിച്ച് കേസന്വേഷണം അട്ടിമറിക്കാനുള്ള ശ്രമമാണ് ഐ.ജി അടക്കമുള്ള പൊലിസ് മേധാവികളുടെ ഭാഗത്തുനിന്ന് ഉണ്ടായതെന്നും അബ്ദുറബ്ബ് കുറ്റപ്പെടുത്തി.
ശബരിമലയിലും തിരൂര്‍ പുതിയങ്ങാടി നേര്‍ച്ചയ്ക്കും വലിയ പൊലിസ് സന്നാഹം ആവശ്യമാണെങ്കിലും ഫൈസല്‍ വധക്കേസിലെ അന്വേഷണ സംഘാംഗങ്ങളെതന്നെ മുഴുവനായി നിയമിച്ചത് കേസ് ദുര്‍ബലപ്പെടുത്താനുള്ള ആസൂത്രിത നീക്കങ്ങളുടെ ഭാഗമാണ്. പൊലിസിന്റെ പക്ഷപാതപരമായ നീക്കങ്ങളെ ജനാധിപത്യ രീതിയില്‍ നേരിടുമെന്നും ശക്തമായ സമരപരിപാടികളുമായി മുന്നോട്ടുപോകുമെന്നും അദ്ദേഹം പറഞ്ഞു.