കോഴിക്കോട്: അമിത ദേശീയതാ വാദം നാശത്തിലേക്കാണ് നയിക്കുകയെന്നും ഗാന്ധിജി ഹിന്ദു മുസ്്‌ലിം ഐക്യത്തിലൂടെ ദേശീയത വളര്‍ത്തുകയാണ് ചെയ്തതെന്നും സാഹിത്യകാരന്‍ കെ.പി രാമനുണ്ണി.
ബഹുസ്വരതയിലൂന്നിയ യഥാര്‍ഥ ഹിന്ദുത്വത്തെ അപമാനിക്കുകയാണ് ഫാഷിസ്റ്റുകള്‍ ചെയ്യുന്നതെന്നും അദ്ദേഹം അഭിപ്രായപ്പെട്ടു. സാമ്പത്തിക കാര്യം പറയുമ്പോള്‍ പോലും രാജ്യസ്‌നേഹത്തെപ്പറ്റി ഓര്‍മിപ്പിക്കുന്നവര്‍ സ്വാതന്ത്ര്യ സമരകാലത്ത് ബ്രിട്ടീഷുകാര്‍ക്ക് മാപ്പെഴുതിക്കൊടുത്ത് തടി തപ്പിയവരാണ്. ത്രിവര്‍ണ പതാകയും ദേശീയഗാനവും തള്ളിപ്പറഞ്ഞവര്‍ അവക്കായി നിലകൊള്ളുന്നത് കാപട്യമാണെന്നും കെ.പി രാമനുണ്ണി പറഞ്ഞു. ജമാഅത്തെ ഇസ്്‌ലാമി ജില്ലാ സമ്മേളനത്തോടനുബന്ധിച്ചുള്ള സാംസ്‌കാരിക സദസ്സ് ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്റ് വി.പി ബഷീര്‍ അധ്യക്ഷനായി. കെ.ടി കുഞ്ഞിക്കണ്ണന്‍, സ്വാമി വിശ്വഭദ്രാനന്ദ ശക്തി ബോധി, പി.കെ പാറക്കടവ്, മുജീബുറഹ്മാന്‍ കിനാലൂര്‍, ഡോ. സി.എം സാബിര്‍ നവാസ്, സി. ദാവൂദ്, ടി.പി മുഹമ്മദ് ശമീം, ബാപ്പു വാവാട്, സമദ് കുന്നക്കാവ് സംസാരിച്ചു. ചടങ്ങില്‍ റാണാ അയ്യൂബിന്റെ ഗുജറാത്ത് ഫയല്‍ മൂടിവക്കപ്പെട്ട സത്യങ്ങള്‍ എന്ന പുസ്തകം പ്രകാശനം ചെയ്തു. ഫൈസല്‍ പൈങ്ങോട്ടായി സ്വാഗതവും എസ്.ഖമറുദ്ദീന്‍ നന്ദിയും പറഞ്ഞു.