പനമരം: ഒരംഗത്തിന്റെ മുന്‍ തൂക്കത്തില്‍ യു.ഡി.എഫ് ഭരിക്കുന്ന പനമരം പഞ്ചായത്തില്‍ ഭരണമാറ്റത്തിനുള്ള സാധ്യത മങ്ങുന്നു. ഇടതുപക്ഷം അവിശ്വസ നോട്ടീസ് കൊടുക്കാന്‍ തയാറാകാത്തതാണ് യു.ഡി.എഫിന് ഗുണമാകുന്നത്. ഭരണകക്ഷിയില്‍പ്പെട്ട സി.എം.പി ഒന്നര മാസം മുമ്പ് ഇടതുപകഷത്തേക്ക് മാറിയിരുന്നു. പഞ്ചായത്തില്‍ സി.എം.പിക്ക് രണ്ട് അംഗങ്ങളാണുള്ളത്. അവിശ്വാസം കൊണ്ടുവന്നാല്‍ ഭരണമാറ്റം ഉറപ്പായിരുന്നു. എന്നാല്‍ ഭരണമാറ്റം ഉണ്ടാകുമ്പോള്‍ സ്ഥാനങ്ങള്‍ക്ക് വേണ്ടിയുള്ള ഇടതുപക്ഷ അംഗങ്ങളുടെ കടുംപിടിത്തങ്ങളാണ് അവിശ്വാസം കൊണ്ടുവരുന്നതില്‍ നിന്ന് ഇടതുപക്ഷത്തെ പിന്തിരിപ്പിക്കുന്നത്. വൈസ് പ്രസിഡന്റ് സ്ഥാനത്തിന് വേണ്ടിയാണ് ഇടത് അംഗങ്ങള്‍ തമ്മില്‍ ശക്തമായ ഉള്‍പോരാട്ടം നടക്കുന്നത്. അവിശ്വാസം കൊണ്ടുവന്നാല്‍ എതിര്‍പക്ഷത്തിന് അനുകൂലമായി വോട്ട് ചെയ്യുമെന്ന അംഗങ്ങളുടെ ഭീഷണിയില്‍ വെട്ടിലായിരിക്കുകയാണ് എല്‍.ഡി.എഫ്. യു.ഡി.എഫിനെ താഴെയിറക്കാന്‍ ഇടതുപക്ഷത്തേക്ക് ചേക്കേറിയ സി.എം.പി ഇപ്പോള്‍ അബദ്ധം പിണഞ്ഞ അവസ്ഥയാണ്.