ചെമ്പേരി: മാനേജ്‌മെന്റിന്റെ വിദ്യാര്‍ഥി പീഡനത്തില്‍ പ്രതിഷധിച്ചു എം.എസ്.എഫ് പ്രവര്‍ത്തകര്‍ വിമല്‍ജ്യോതി എന്‍ജിനിയറിങ് കോളജിലേക്ക് മാര്‍ച്ച് നടത്തി. കോളജ് ഗേറ്റിനു മുന്നില്‍ സംഘടിച്ച മാനേജ്‌മെന്റിനെ അനുകൂലിക്കുന്നവരും സെക്യൂരിറ്റിക്കാരും ചേര്‍ന്നു പ്രവര്‍ത്തകരെ തടയാനും കൈയേറ്റം ചെയ്യാനും ശ്രമിച്ചത് സംഘര്‍ഷത്തിനിടയാക്കി. ഇരുവിഭാഗത്തെയും ശാന്തരാക്കാന്‍ പൊലിസ് ഇടപെട്ടു. വിദ്യാര്‍ഥികള്‍ക്കു നേരെ നടക്കുന്ന അതിക്രമങ്ങളെകുറിച്ചു സംസാരിക്കുന്നതിനായി എം.എസ്.എഫ് നേതാക്കള്‍ പ്രിന്‍സിപ്പലിനോട് സംസാരിക്കുന്നതിനായി അകത്തേക്കു പ്രവേശിക്കുന്നതിനിടെ മാനേജ്‌മെന്റ് പ്രതിനിധികളില്‍ ചിലരും പൊലിസും നേതാക്കളെ മര്‍ദിച്ചതായും പരാതിയുണ്ട്. എം.എസ്.എഫ് ജില്ലാപ്രസിഡന്റ് സി.കെ നജാഫ്, സെക്രട്ടറി മുഹമ്മദ്കുഞ്ഞി, നസീര്‍, ബനീര്‍ ഇരിക്കൂര്‍, ഫവാസ് പുന്നാട്, നൗഫല്‍ പാനോള്‍, ഇജാസ് ആറളം, ഹക്കീം ചെമ്പിലോട്, അനീസ് എന്നിവര്‍ക്കാണ് പരുക്കേറ്റത്.