അരിമ്പ്ര: മലപ്പുറം ജില്ലാ ലീഗ് എഫ്. ഡിവിഷന്‍ ലീഗ് ഫുട്‌ബോള്‍ ടൂര്‍ണമെന്റിന്റെ ആദ്യ മത്സരത്തില്‍ യുനൈറ്റഡ് എഫ്.സി മലപ്പുറം (മുനമ്പത്ത്) എതിരില്ലാത്ത രണ്ട് ഗോളുകള്‍ക്ക് മലപ്പുറം എഫ്.സിയെയും രണ്ടാം മത്സരത്തില്‍ തിരൂരങ്ങാടി പി.എസ്.എം.ഒ കോളജ് മറുപടിയില്ലാത്ത മൂന്ന് ഗോളുകള്‍ക്ക് കാളികാവ് ഫ്രണ്ട്‌സ് ക്ലബിനെയും പരാജയപ്പെടുത്തി.
സന്തോഷ് ട്രോഫി കേരളാ ടീം ക്യാപ്റ്റന്‍ പി. ഉസ്മാന്‍ ടൂര്‍ണമെന്റ് ഉദ്ഘാടനം ചെയ്തു. വൈസ് ക്യാപ്റ്റന്‍ കെ. ഫിറോസ്, മുന്‍ മലപ്പുറം ജില്ലാ സീനിയര്‍ ഫുട്‌ബോള്‍ ടീം കോച്ച് ഉമ്മര്‍കോയ എന്നിവര്‍ മുഖ്യാതിഥികളായി, മലപ്പുറം ബ്ലോക്ക് പഞ്ചായത്ത് മെമ്പര്‍ മനങ്ങറ്റ കുഞ്ഞാലന്‍ കുട്ടി ഹാജി അധ്യക്ഷനായി. മൊറയൂര്‍ പഞ്ചായത്ത് മെമ്പര്‍ എന്‍. ഹംസ ഹാജി, ഡി.എഫ്.എ സെക്രട്ടറിമാരായ കെ.എ നാസര്‍, നഈം ചേറൂര്‍, എന്‍. മോനുദ്ദീന്‍ മാസ്റ്റര്‍, ഇ. ഹംസ ഹാജി, സി.ടി അജ്മല്‍ സംസാരിച്ചു.
ഇന്ന് ആദ്യ മത്സരത്തില്‍ ന്യൂകാസില്‍ കൊട്ടപ്പുറം സോക്കര്‍ യൂത്ത് മുണ്ടുപറമ്പിനെയും രണ്ടാം മത്സരത്തില്‍ എറനാട് എഫ്.സി മഞ്ചേരി പി.എസ്.എം.ഒ കോളജ് തിരൂരങ്ങാടിയെയും നേരിടും.