എടപ്പാള്‍: സംസ്ഥാന പാതയില്‍ കണ്ടണ്ടനകത്ത് പ്രവര്‍ത്തിക്കുന്ന ബിവറേജസ് ഔട്ട്‌ലെറ്റ് പുതിയ കെട്ടിടത്തിലേക്ക് മാറ്റുന്നു എന്ന വിവരത്തെ തുടര്‍ന്ന് പ്രദേശവാസികള്‍ യോഗം ചേര്‍ന്നു.
കണ്ടണ്ടനകം പാലപ്രക്ക് സമീപം ആശാരി പടിക്കലെ നാട്ടുകാരാണ് യോഗം ചേര്‍ന്നത്. ഇവിടെയുള്ള സ്വകാര്യ വ്യക്തിയുടെ ഒഴിഞ്ഞ് കിടക്കുന്ന വീട്ടിലേക്ക് കണ്ടനകത്തെ ബിവറേജസ് ഔട്ട്‌ലെറ്റ് മാറ്റാന്‍ രഹസ്യ നീക്കം നടക്കുന്നുവെന്ന വിവരത്തെ തുടര്‍ന്നാണ് നാട്ടുകാര്‍ യോഗം ചേര്‍ന്നത്.
മാര്‍ച്ച് മുപ്പത്തിയൊന്നിന് മുന്‍പായി സംസ്ഥാനപാതയില്‍ പ്രവര്‍ത്തിക്കുന്ന മദ്യ വില്‍പനശാലകള്‍ മാറ്റണമെന്ന കോടതി വിധിയുടെ അടിസ്ഥാനത്തില്‍ കണ്ടണ്ടനകത്തെ ഔട്ട്‌ലെറ്റ് മാറ്റാന്‍ നീക്കം നടക്കുന്നുവെന്ന സൂചനയുടെ അടിസ്ഥാനത്തിലാണ് യോഗം ചേര്‍ന്നത്. ജനവാസകേന്ദ്രത്തില്‍ മദ്യശാല സ്ഥാപിക്കാന്‍ അനുവദിക്കുകയില്ലെന്നും അത്തരം നീക്കം നടക്കുകയാണെങ്കില്‍ പ്രത്യക്ഷ സമരപരിപാടികളുമായി രംഗത്ത് വരുമെന്നും നാട്ടുകാര്‍ അറിയിച്ചു. നേരത്തെ വട്ടംകുളം കുറ്റിപ്പാലയിലേക്ക് ഔട്ട്‌ലെറ്റ് മാറ്റാന്‍ നീക്കം നടന്നിരുന്നെങ്കിലും നാട്ടുകാരുടെ പ്രതിഷേധത്തെ തുടര്‍ന്ന് പിന്‍മാറുകയായിരുന്നു.