പാലക്കാട്: സന്നദ്ധ സംഘടനയായ എം.എ. പ്ലൈ ഫൗണ്ടേഷന്റെ നേതൃത്വത്തില്‍ ആരംഭിക്കുന്ന പുതിയ ചാപ്റ്റര്‍ ജെ.സി.ഐ. എം.എ. പ്ലൈ എന്‍.ജി.ഒ. നാളെ ഉച്ചക്ക് 12.20 ന് കൊട്ടേക്കാട് സ്‌നേഹജ്വാല വൃദ്ധസദനത്തില്‍ ജെ.സി.ഐ ഇന്ത്യ മുന്‍ ദേശീയ അധ്യക്ഷന്‍  സന്തോഷ് കുമാര്‍. പി. ഉദ്ഘാടനം ചെയ്യും. അതിഥിയായി മേഖലാ പ്രസിഡന്റ് സി.പി. അബ്ദുള്‍ സലാം പങ്കെടുക്കും.
ഒരു പതിറ്റാണ്ടിലധികമായി ജീവ കാരുണ്യ പ്രവര്‍ത്തന രംഗത്ത് ശ്രദ്ധേയമായ എം.എ. പ്ലൈ ഫൗണ്ടേഷനും ആഗോള തലത്തില്‍ കരുത്തുറ്റ യുവജന പ്രസ്ഥാനമായ ജെ.സി.ഐ. യും കൈകോര്‍ക്കുന്നതിലൂടെ ജനസേവനത്തില്‍ ആശാവഹമായ മാറ്റങ്ങള്‍ക്ക് നിദാനമാകും. അന്താരാഷ്ട്രതലത്തില്‍ ഐക്യരാഷ്ട്രസഭയുടെ അംഗീകാരമുള്ളതും 120 ല്‍ പരം രാജ്യങ്ങളില്‍ വ്യാപിച്ചു കിടക്കുന്നതുമായ ജെ.സി.ഐ. ക്ക് രാജ്യത്ത് ആദ്യമായിട്ടാണ് ഒരു സന്നദ്ധസംഘടനയുടെ നേതൃത്വത്തില്‍ ചാപ്റ്റര്‍ രൂപീകരിക്കുന്നത്.