മാസപ്പടി വിവാദത്തില്‍ കൂടുതല്‍പേര്‍ക്ക് നോട്ടീസ് അയച്ച് എന്‍ഫോസ്‌മെന്റ് ഡയറക്ട്രറ്റ്. ഇന്നാണ് ചോദ്യം ചെയ്യലിന് ഹാജരാകേണ്ടത്. ഇന്നലെ ഇഡിക്ക് മുന്നില്‍ ഹാജരായത് മൂന്ന് സിഎംആര്‍എല്‍ പ്രതിനിധികളാണ്. ചീഫ് ഫിനാന്‍സ് ഓഫീസര്‍, ഐടി മാനേജര്‍, സീനിയര്‍ ഐടി ഓഫീസര്‍ എന്നിവരാണ് ഇന്നലെ ഹാജരായത്. ഇന്നലെ ഉച്ചയോടെ തുടങ്ങിയ ഇവരുടെ ചോദ്യം ചെയ്യല്‍ ഇന്നും തുടരുകയാണ്.

ഹാജരാകാന്‍ നിര്‍ദേശം നല്‍കിയ സിഎംആര്‍എല്‍ എംഡി ശശിധരന്‍ കര്‍ത്ത ആരോഗ്യപ്രശ്‌നങ്ങള്‍ ചൂണ്ടിക്കാട്ടി ഒഴിഞ്ഞു മാറിയിരുന്നു. നിലവില്‍ കേസില്‍ എസ്എഫ്‌ഐഒ അന്വേഷണം തുടരുന്നതിനിടെയാണ് സമാന്തരമായി ഇഡി അന്വേഷണവും നടക്കുന്നത്.

ഫിനാന്‍സ് ചുമതലയുള്ള ഉദ്യോഗസ്ഥരെയാണ് പ്രാരംഭ ഘട്ടത്തില്‍ അന്വേഷണത്തില്‍ ഉള്‍പ്പെടുത്തുന്നത്. ശശിധരന്‍ കര്‍ത്തയുടെ ചോദ്യം ചെയ്യലിനു ശേഷം  കേസുമായി ബന്ധപ്പെട്ട് മുഖ്യമന്ത്രിയുടെ മകള്‍ വീണ വിജയന്‍, സോഫ്റ്റ് വെയര്‍  കമ്പനി എക്‌സാലോജിക്ക് തുടങ്ങിയവരേയും അന്വേഷണ പരിധിയില്‍ ഉള്‍പ്പെടുത്തും.