ചാംപ്യന്‍സ് ലീഗ് ഫുട്‌ബോളില്‍ ഇന്ന് ടീമുകള്‍ നിലനില്‍പ്പിന്റെ പോരാട്ടം നടത്തുമ്പോള്‍ കാണികള്‍ക്കത് ആവേശരാവ്. രാത്രി 12.30ന് നടക്കുന്ന രണ്ട് മത്സരങ്ങളില്‍ നിലവിലെ ചാംപ്യന്‍സ് ലീഗ് രാജാക്കന്മാരായ മാഞ്ചസ്റ്റര്‍ സിറ്റി ലാലിഗ ജേതാക്കളായ റയല്‍മാഡ്രിഡിനെയും ബുണ്ടസ്ലീഗ് വമ്പന്‍മാരായ ബയേണ്‍ മ്യൂണിക് ഇംഗ്ലീഷ് പ്രിമിയര്‍ ലീഗിലെ ആഴ്സനലിനെയും നേരിടും.

 ക്വാര്‍ട്ടറിലെ ആദ്യപാദ മത്സരത്തില്‍ നാലു ടീമുകളും സമനിലയോടെ ബൂട്ടഴിച്ചതിനാല്‍ സെമി ടിക്കറ്റിന് ഇവര്‍ക്ക് ജീവന്‍മരണപ്പോരാട്ടം. ആഴ്‌സനലും ബയേണും രണ്ട് വീതം ഗോളുകളടിച്ച് പിരിഞ്ഞപ്പോള്‍ റയലും സിറ്റിയും 3- 3നും ബുട്ടഴിച്ചു. അതേസമയം, ബയേണിന്റെ ഇന്നത്തെ മത്സരം സ്വന്തം തട്ടകമായ മ്യൂണിക്കിലെ അലിയന്‍സ് അറീനയിലാണെന്നതിനാല്‍ ആഴ്‌സനലിന് ജയിക്കാന്‍ ചെറുതായൊന്നുമല്ല വിയര്‍ക്കേണ്ടി വരിക.

ഇതേസമയത്ത് നടക്കുന്ന മറ്റൊരു മത്സരം സിറ്റിയുടെ ഇത്തിഹാദ് സ്റ്റേഡിയത്തിലാണെന്നതിനാല്‍ സിറ്റിക്ക് കാര്യങ്ങള്‍ എളുപ്പമാകും. എന്നാല്‍ മുന്‍ചാംപ്യന്‍മാരായ റയലിനെ എഴുതിത്തള്ളാന്‍ സിറ്റി ഒരുക്കമല്ല. കളി സ്വന്തം മൈതാനത്താണെങ്കിലും മികച്ച പോരാട്ടം തന്നെ സിറ്റി പുറത്തെടുക്കും.