തേഞ്ഞിപ്പലം: മീഞ്ചന്ത ഗവ. കോളജ് ഒന്നാംവര്‍ഷ മലയാളം വിദ്യാര്‍ഥിനിയും തേഞ്ഞിപ്പലം കടക്കാട്ടുപാറ സ്വദേശിനിയുമായ നസിയത്തിന് സഹപാഠികളുടെ സ്‌നേഹവീട്. മീഞ്ചന്ത ഗവ. ആര്‍ട്‌സ് ആന്‍ഡ് സയന്‍സ് കോളജ് എന്‍.എസ്.എസ് യൂനിറ്റിന്റെ ആഭിമുഖ്യത്തിലാണ് നിര്‍ധന കുടുംബത്തിലെ വിദ്യാര്‍ഥിനിക്ക് വീട് നിര്‍മിച്ചുനല്‍കുന്നത്. നിലവില്‍ വാടകവീട്ടിലാണ് ഇവരുടെ താമസം. നസിയത്തിന്റെ പിതാവ് ക്ഷയരോഗിയായി കാലങ്ങളായി കിടപ്പിലാണ്. നസിയത്ത് ഹാര്‍ട്ട് സര്‍ജറി കഴിഞ്ഞ് ചികിത്സയിലാണ്.
മാതാവ് വീട്ടുജോലിക്ക് പോയിട്ടാണ് ഈ കുടുംബത്തിന്റെ നിത്യവൃത്തിക്കുള്ള പണം കണ്ടെത്തുന്നത്. തേഞ്ഞിപ്പലം ഗ്രാമപഞ്ചായത്തുമായും പ്രദേശത്തെ സാംസ്‌കാരിക സംഘടനകളുമായും സഹകരിച്ചാണ് ദൗത്യം പൂര്‍ത്തീകരിക്കുക.
പഞ്ചായത്ത് പ്രസിഡന്റ് സഫിയറസാഖ് തോട്ടില്‍ ചെയര്‍പേഴ്‌സണും എന്‍.എസ്.എസ് പ്രോഗ്രാം ഓഫിസര്‍ ഡോ. സി.പി ബേബിഷീബ കണ്‍വീനറുമായി കമ്മിറ്റിക്ക് രൂപം നല്‍കി.
ആലുങ്ങല്‍ വി.ഇ.എം പബ്ലിക് സ്‌കൂളില്‍ നടന്ന യോഗത്തില്‍ പ്രൊഫ. രമേഷ് ബാബു, ഡോ. പി.കെ ദിനേഷ്, ഡോ. സ്റ്റാലിന്‍ദാസ്, സഫിയറസാഖ്, എം അബ്ദുല്‍ അസീസ്, കെ.ടി ജാഫര്‍ സംസാരിച്ചു.