ഈരാറ്റുപേട്ട: ഇലക്ട്രിക് ലൈനില്‍ നിന്നും തീ പടര്‍ന്ന്  തലനാട് പഞ്ചായത്തിലെ അയ്യമ്പാറയില്‍ അഞ്ച് ഏക്കറോളം കൃഷി ഭൂമി കത്തി നശിച്ചു.
ഇന്നലെ രാവിലെ 9 നാണ് തീപിടുത്തം ഉണ്ടായത്. ഇവിടെ ഇലക്ട്രിക് ലൈനുകള്‍ വളരെ താഴ്ന്നാണ് കിടക്കുന്നത്. കാറ്റുവന്നപ്പോള്‍ ലൈനുകള്‍ കൂട്ടിയിടിച്ചതാണ് തീ പടരാന്‍ കാരണം എന്ന് നാട്ടുകര്‍ പറഞ്ഞു.
നാട്ടുകാരും ഈരാറ്റുപേട്ട ഫയര്‍ഫോഴ്‌സും ചേര്‍ന്ന് തീയണച്ചു. വെട്ടിക്കുളത്ത്പാറക്കല്‍ ഗോപാലകൃഷ്ണന്‍, കോടശേരിയില്‍ സലീം, പ്ലാക്കൂട്ടംപറമ്പില്‍  ജോമോന്‍ എന്നിവരുടെ കൃഷിഭൂമികള്‍ പൂര്‍ണമായും കത്തിനശിച്ചു.
റബര്‍, കുരുമുളക്, വാഴ, മരച്ചീനി, മാവ്, പ്ലാവ് എന്നിവയാണ് കത്തി നശിച്ചത്. മീനച്ചില്‍ തഹസില്‍ദാര്‍, തലനാട് വില്ലേജ് ഓഫിസര്‍ എന്നിവര്‍ സ്ഥലത്തെത്തി നാശനഷ്ടം വിലയിരുത്തി.