ആലപ്പുഴ: ദേശീയമൂല്യങ്ങളെ ചവിട്ടി മെതിക്കുകയും, രാഷ്ട്രപിതാവിനെപ്പോലും അവഹേളിക്കുകയും ചെയ്യുന്ന പ്രധാനമന്ത്രി നരേന്ദ്രമോദിയുടേയും, കേന്ദ്ര സര്‍ക്കാരിന്റേയും നടപടികള്‍ക്കെതിരെ ശക്തമായ പ്രക്ഷോഭം രാജ്യത്തെ ജനാധിപത്യ, മതേതര വിശ്വാസികള്‍ നടത്തണമെന്ന് പ്രതിപക്ഷ നേതാവ് രമേശ് ചെന്നിത്തല പ്രസ്താവിച്ചു.
ത്രിവര്‍ണ്ണ പതാകയെ ചവിട്ടി മെതിക്കുവാനും, ദേശീയതയുടെ പ്രതീകമായ ചര്‍ക്കയെ അവഹേളിക്കാനും മോദിക്കും കൂട്ടര്‍ക്കും ഒരു മനസാക്ഷി കുത്തും ഉണ്ടായില്ല. രാജ്യത്തെ സഹകരണ പ്രസ്ഥാനത്തെ തകര്‍ത്ത് തരിപ്പണമാക്കിയിരിക്കുകയാണ് കേന്ദ്ര സര്‍ക്കാര്‍. ഇതിനെല്ലാം പിണറായി സര്‍ക്കാര്‍ പിന്തുണ നല്‍കുകയും, കൂട്ടുനില്‍ക്കുകയുമാണ്. ഡി.സി.സിയില്‍ യു.ഡി.എഫ് നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ജനദ്രോഹ നടപടികള്‍ക്കെതിരെ ജനുവരി 24 ചെവ്വാഴ്ച ആലപ്പുഴ കളക്ടറേറ്റ് പിക്കറ്റ് ചെയ്യാന്‍ യു.ഡി.എഫ് ജില്ലാ കമ്മിറ്റി യോഗം തീരുമാനിച്ചു. കേരളത്തിലെ തന്നെ റേഷന്‍ സവിധാനം അട്ടിമറിച്ചതിനെതിരേയും, പാവപ്പെട്ടവരുടെ ക്ഷേമപെന്‍ഷന്‍ നിഷേധിക്കുകയും, വരള്‍ച്ചയെ നേരിടാനോ, കുടിവെള്ള പ്രശ്‌നം പരിഹരിക്കുവാനോ ഒരു നടപടിയും സ്വീകരിക്കാത്ത സര്‍ക്കാരിനെതിരേയുള്ള പിക്കറ്റിംഗ് സമരത്തില്‍ അയ്യായിരം പേരെ പങ്കെടുപ്പിക്കാനും തീരുമാനിച്ചു.
സമരപരിപാടികള്‍ക്ക് രൂപം നല്‍കുവാന്‍ യു.ഡി.എഫിന്റെ നിയോജകമണ്ഡലം നേതൃസമ്മേളനങ്ങള്‍ 19, 20, 21 തിയതികളില്‍ നടത്തും. 19 ന് 3 മണി ചെങ്ങന്നൂര്‍, 4 മണി മാവേലിക്കര, 6 മണി കായംകുളം ജനുവരി 20 ന് 3 മണി അരൂര്‍, 4 മണി ചേര്‍ത്തല 6 മണി ആലപ്പുഴ, ജനുവരി 21 ന് 3 മണി ഹരിപ്പാട്, 4 മണി കുട്ടനാട്, 6 മണി അമ്പലപ്പുഴ എന്നിങ്ങനെ നടത്തുവാന്‍ യോഗം തീരുമാനിച്ചു.യു.ഡി.എഫ് ജില്ലാ ചെയര്‍മാന്‍ എം.മുരളി അധ്യക്ഷത വഹിച്ചു. കെ.സി.വേണുഗോപാല്‍ .എം.പി, സി.ആര്‍.ജയപ്രകാശ്, ബി.ബാബുപ്രസാദ്, എ.എ.ഷുക്കൂര്‍, ഏ.എം.നസീര്‍, കണ്ടല്ലൂര്‍ ശങ്കരനാരായണന്‍, ജോര്‍ജ് ജോസഫ്, ഏ.നിസാര്‍, ഡി.സുഗതന്‍, കെ.കെ.ഷാജു, കെ.പി.ശ്രീകുമാര്‍, പ്രൊഫ. ഡി.നാരായണന്‍കുട്ടി, അഡ്വ.സണ്ണിക്കുട്ടി, പ്രൊഫ.നെടുമുടി ഹരികുമാര്‍, എ.യഹ്യാ തുടങ്ങിയവര്‍ പ്രസംഗിച്ചു.