കൊട്ടാരക്കര: ബ്‌ളോക്ക് കോണ്‍ഗ്രസ് കമ്മറ്റി ആസ്ഥാനമായ കോണ്‍ഗ്രസ് ഭവനും ആര്‍.എസ്.പി മണ്ഡലം കമ്മിറ്റി ഓഫിസിനും നേരെയുണ്ടായ ആക്രമണത്തില്‍ പ്രതിഷേധിച്ച് നഗരസഭാ പരിധിയില്‍ യു.ഡി.എഫ് നടത്തിയ ഹര്‍ത്താല്‍ പൂര്‍ണം.
നഗരസഭാ പരിധിയിലാണ് ഹര്‍ത്താലിന് ആഹ്വാനം ചെയ്തിരുന്നതെങ്കിലും സമീപ പഞ്ചായത്തുകളിലെ ചിലയിടങ്ങളിലും ഹര്‍ത്താല്‍ ബാധിച്ചു. പട്ടണത്തിലെ കടകമ്പോളങ്ങള്‍ പൂര്‍ണമായും അടഞ്ഞു കിടന്നു. സ്വകാര്യ വാഹനങ്ങള്‍ മാത്രമാണ് നിരത്തിലിറങ്ങിയത്. ബാങ്കുകളും മറ്റ് സര്‍ക്കാര്‍ ഓഫിസുകളും തുറന്നു പ്രവര്‍ത്തിപ്പിക്കാന്‍ ശ്രമം നടന്നുവെങ്കിലും പ്രവര്‍ത്തകരെത്തി അടപ്പിച്ചു.
വാക്കേറ്റങ്ങള്‍ പലയിടങ്ങളിലും ഉണ്ടായെങ്കിലും ഹര്‍ത്താല്‍ പൊതുവെ സമാധാനപരമായിരുന്നു. ടൗണിന്റെ മിക്ക ഭാഗങ്ങളിലും പൊലിസ് സാന്നിധ്യം ഉറപ്പിച്ചിരുന്നതിനാല്‍ പ്രകടനവുമായി ബന്ധപ്പെട്ട് പോലും അനിഷ്ഠ സംഭവങ്ങള്‍ ഉണ്ടായില്ല.
രാവിലെ 10 മണിയോടെ കോണ്‍ഗ്രസ് ഭവനില്‍ നിന്നാണ് യു.ഡി.എഫിന്റേതായ പ്രതിഷേധ പ്രകടനം സംഘടിപ്പിച്ചത്. ടൗണ്‍ ചുറ്റി നടന്ന പ്രകടനത്തില്‍ യു.ഡി.എഫ് നേതാക്കളായ കെ.എസ്. വേണുഗോപാല്‍, സി. മോഹനന്‍ പിള്ള, കുളക്കട രാജു, വെളിയം ശ്രീകുമാര്‍, പി. ഹരികുമാര്‍, ബ്രിജേഷ് എബ്രഹാം, വി. ഫിലിപ്പ്, ബിജു എബ്രഹാം, ബേബി പടിഞ്ഞാറ്റിന്‍കര, കെ.ജി. അലക്‌സ്, ഒ. രാജന്‍, പെരുംകുളം ദിലീപ്, നെല്‍സണ്‍ തോമസ്, തോമസ് പണിക്കര്‍, ജി. സോമശേഖരന്‍ നായര്‍, സലാഹുദ്ദീന്‍, പവിജ പത്മന്‍, ഷെമീന ഷംസുദ്ദീന്‍, താമരക്കുടി വിജയകുമാര്‍, ആര്‍. രാജശേഖരന്‍ പിള്ള, അജുജോര്‍ജ്ജ്, ഷിജു എന്നിവര്‍ നേതൃത്വം നല്‍കി.
മുന്‍ ആഭ്യന്തര വകുപ്പ് മന്ത്രി രമേശ് ചെന്നിത്തല, ആര്‍.എസ്.പി സംസ്ഥാന സെക്രട്ടറി എ.എ. അസീസ്, മുന്‍ ഡി.സി.സി പ്രസിഡന്റ് വി. സത്യശീലന്‍, കെ.പി.സി.സി ജനറല്‍ സെക്രട്ടറി ജി. രതികുമാര്‍ തുടങ്ങിയ നേതാക്കള്‍ കോണ്‍ഗ്രസ് ഭവനും ആര്‍.എസ്.പി ഓഫിസും സന്ദര്‍ശിച്ചു.