ന്യൂഡല്‍ഹി: ബി.ജെ.പിയുടെ രാജ്യസഭാംഗത്വവും പാര്‍ട്ടി അംഗത്വവും ഉപേക്ഷിച്ച മുന്‍ ക്രിക്കറ്റ് താരം നവ്‌ജ്യേത് സിങ് സിദ്ദു കോണ്‍ഗ്രസില്‍ ചേര്‍ന്നു. ഡല്‍ഹിയിലെ കോണ്‍ഗ്രസ് ആസ്ഥാനത്ത് പാര്‍ട്ടി ഉപാധ്യക്ഷന്‍ രാഹുല്‍ഗാന്ധിയുടെ സാന്നിധ്യത്തിലാണ് സിദ്ദു കോണ്‍ഗ്രസ് അംഗത്വമെടുത്തത്.
കഴിഞ്ഞ സെപ്റ്റംബറില്‍ ബി.ജെ.പി വിട്ട സിദ്ദു, ഉടന്‍ കോണ്‍ഗ്രസിലെത്തുമെന്നു വാര്‍ത്തയുണ്ടായിരുന്നു. ഇതിന്റെ ഭാഗമായി ഇന്നലെ രാഹുലുമായി നടത്തിയ ചര്‍ച്ചയ്ക്കുശേഷമാണ് ഔദ്യോഗികമായി പാര്‍ട്ടിയില്‍ ചേര്‍ന്നതായി സിദ്ദു വ്യക്തമാക്കിയത്.
സിദ്ദുവിന്റെ ഭാര്യ നവ്‌ജ്യോത് കൗര്‍ നേരത്തെ കോണ്‍ഗ്രസില്‍ ചേര്‍ന്നിരുന്നു. അടുത്തമാസം നിയമസഭാ തെരഞ്ഞെടുപ്പ് നടക്കുന്ന പഞ്ചാബില്‍ കോണ്‍ഗ്രസ് ടിക്കറ്റില്‍ സിദ്ദു മത്സരിക്കും. അമൃത്‌സറില്‍നിന്നാവും ജനവിധി തേടുക.