കണ്ണൂര്‍: പത്തുവര്‍ഷത്തിനു ശേഷം കണ്ണൂരില്‍ വിരുന്നെത്തുന്ന സംസ്ഥാന സ്‌കൂള്‍ കലോത്സവത്തിന്റെ മുന്നോടിയായി ഇന്നു നടക്കുന്ന ഘോഷയാത്രചരിത്രസംഭവമാക്കാന്‍ കണ്ണൂര്‍. ഇന്ന് ഉച്ചയ്ക്ക് രണ്ടരയ്ക്കു കണ്ണൂര്‍ സെന്റ് മൈക്കിള്‍സ് ഗ്രൗണ്ടില്‍ നിന്നും പ്രയാണമാരംഭിച്ചു മുഖ്യവേദിയായ കണ്ണൂര്‍ പൊലിസ് മൈതാനിയില്‍ സമാപിക്കുന്ന ഘോഷയാത്രയില്‍ ആബാലവൃദ്ധം ജനങ്ങള്‍ പങ്കെടുക്കും. അന്‍പത്തിയേഴാമത് സ്‌കൂള്‍ കലോത്സവത്തിനെ പ്രതീകരിച്ചുകൊണ്ട് 57 കൊടികളും മുത്തുക്കുടകളും കൈയിലേന്തും. വാദ്യഘോഷങ്ങളും കലാവതരണങ്ങളും ഘോഷയാത്രയെ വര്‍ണശബളമാക്കും. ഇന്നലെ നടന്ന അവലോകനയോഗത്തില്‍ സംഘാടകസമിതി ഭാരവാഹികളായ ഒ.കെ വിനീഷ്,ജെസി ജോസഫ്, കെ.കെ സുബൈര്‍, പി.വി വത്‌സന്‍ സംസാരിച്ചു.