കൊച്ചി : വിജിലന്‍സ് ഡയറക്ടര്‍ ജേക്കബ് തോമസിനെതിരേ സി.ബി.ഐ അന്വേഷണം വേണമെന്ന ഹരജി തള്ളിയതിനെതിരേ സമര്‍പ്പിച്ച അപ്പീല്‍ ഹൈക്കോടതി ഡിവിഷന്‍ ബെഞ്ച് പിന്നീട് പരിഗണിക്കാനായി മാറ്റി. കേരള ട്രാന്‍സ്‌പോര്‍ട്ട് ഡവലപ്‌മെന്റ് ഫിനാന്‍സ് കോര്‍പ്പറേഷന്‍ എം.ഡിയായിരിക്കെ ഗവേഷണത്തിനായി അവധിയെടുത്ത് ജേക്കബ് തോമസ് കൊല്ലത്തെ ഒരു സ്വകാര്യ സ്ഥാപനത്തില്‍ ജോലി നോക്കി.
ഈ സംഭവത്തില്‍ ജേക്കബ് തോമസ് ഓണറേറിയം മുഴുവന്‍ തിരികെ നല്‍കിയ സാഹചര്യത്തില്‍ തുടര്‍ നടപടി വേണ്ടെന്നായിരുന്നു സര്‍ക്കാര്‍ തീരുമാനം. അനുമതിയില്ലാതെ സ്വകാര്യ സ്ഥാപനത്തില്‍ ജോലി ചെയ്ത സംഭവം സി.ബി.ഐ അന്വേഷിക്കണമെന്നായിരുന്നു ഹരജിക്കാരന്റെ ആവശ്യം. എന്നാല്‍ ജേക്കബ് തോമസ് തുറമുഖ വകുപ്പ് ഡയറക്ടറായിരിക്കെ മണ്ണെടുപ്പുമായി ബന്ധപ്പെട്ട കേസില്‍ ഹരജിക്കാരനെതിരേ നടപടി സ്വീകരിച്ചിരുന്നെന്നും ഇതിലുള്ള വൈരാഗ്യമാണ് ഹരജിക്കടിസ്ഥാനമെന്നും സര്‍ക്കാര്‍ ചൂണ്ടിക്കാട്ടി. സര്‍ക്കാരിന്റെ വാദത്തില്‍ കഴമ്പുണ്ടെന്ന് വിലയിരുത്തിയാണ് സിംഗിള്‍ബെഞ്ച് ഹരജി തള്ളിയത്. കണ്ണൂര്‍ കൂത്തുപറമ്പ് സ്വദേശി സത്യന്‍ നരവൂരാണ് അപ്പീല്‍ നല്‍കിയത്.