ന്യൂഡല്‍ഹി: തലയോട്ടിയില്ലാത്ത ഭ്രൂണം നശിപ്പിക്കാന്‍ മുംബൈ സ്വദേശിനിയായ യുവതിക്കു സുപ്രിംകോടതി അനുമതിനല്‍കി. മാതാവിന്റെ ജീവന്‍ അപകടത്തിലാണെന്ന് ഉറപ്പായാല്‍ വ്യവസ്ഥകളോടെ ഭ്രൂണത്തെ നശിപ്പിക്കാമെന്നാണ് കോടതി വ്യക്തമാക്കിയത്. തലയോട്ടി വളര്‍ന്നിട്ടില്ലാത്ത ഭ്രൂണം നശിപ്പിക്കാന്‍ അനുവദിക്കണമെന്നും ഇല്ലെങ്കില്‍ തന്റെ ജീവന്‍ അപകടത്തിലാകുമെന്നും ചൂണ്ടിക്കാട്ടിയാണ് യുവതി കോടതിയെ സമീപിച്ചത്. യുവതി ചികില്‍സതേടിയ മുംബൈ കെ.ഇ.എച്ച് ആശുപത്രിയിലെ ഏഴംഗ വിദഗ്ധ ഡോക്ടര്‍മാരുടെ മെഡിക്കല്‍ റിപ്പോര്‍ട്ട് ഉള്‍പ്പെടെ ഹരജിക്കാരി സുപ്രിംകോടതിയില്‍ സമര്‍പ്പിച്ചിരുന്നു. വിവാഹ വാഗ്ദാനം നല്‍കി കാമുകന്‍ പീഡിപ്പിച്ചതിനെ തുടര്‍ന്ന് ഗര്‍ഭിണിയായ യുവതിയുടെ വയറ്റിലെ ഭ്രൂണത്തിന് ആറുമാസത്തെ വളര്‍ച്ചയുണ്ട്. ഹരജി പരിഗണിച്ച ജസ്റ്റിസുമാരായ എസ്.എ ബോബ്‌ദെ, എല്‍. നാഗേശ്വര റാവു എന്നിവരടങ്ങിയ രണ്ടംഗ ബെഞ്ച്, മാതാവിന്റെ ജീവന് ഭീഷണിയുള്ള സാഹചര്യത്തില്‍ ഭ്രൂണം നശിപ്പിക്കുന്നതിനു നിയമ തടസമില്ലെന്ന് വിധിച്ചു.
ഗര്‍ഭസ്ഥ ശിശുവിന് അനെന്‍സിഫാലി എന്ന രോഗാവസ്ഥ ഉണ്ടെന്നും കുഞ്ഞ് ജനിച്ചാല്‍ തലച്ചോറോ തലയോട്ടിയോ ഇല്ലാതെ ആയിരിക്കുമെന്നും യുവതി അറിയിച്ചു. അങ്ങനെ സംഭവിച്ചാല്‍ അത് തന്നെ കടുത്ത മാനസിക പ്രശ്‌നങ്ങള്‍ക്ക് അടിമയാക്കുമെന്നും അതിനാല്‍ ഗര്‍ഭച്ഛിദ്രത്തിന് അനുവദിക്കണമെന്നും ഹരജിക്കാരി അഭ്യര്‍ഥിച്ചു.
ഗര്‍ഭം അലസിപ്പിക്കുന്നതു സംബന്ധിച്ച നിയമത്തിലെ മാനദണ്ഡങ്ങള്‍ കേന്ദ്രസര്‍ക്കാര്‍ പരിഷ്‌ക്കരിക്കാനിരിക്കേയാണ് കോടതി വിധിവരുന്നത്. മൂന്നുവര്‍ഷത്തിനിടെ സമാന ആവശ്യവുമായി മഹാരാഷ്ര്ടയില്‍ നിന്ന് കോടതിയെ സമീപിക്കുന്ന നാലാമത്തെ കേസാണിത്.