ദോഹ: ഖത്തറില്‍ വിദ്യാര്‍ഥികളുടെ ആരോഗ്യവും സുരക്ഷയും ഉറപ്പാക്കാന്‍ പരീക്ഷാസമയങ്ങളില്‍ സ്‌കൂളുകളില്‍ നഴ്‌സുമാരുടെ സേവനം ഉറപ്പാക്കും. ആരോഗ്യബുദ്ധിമുട്ടുകള്‍ കൂടാതെ സുഗമമായി പരീക്ഷ എഴുതുന്നതിന് വിദ്യാര്‍ഥികള്‍ക്ക് അനുയോജ്യമായ അന്തരീക്ഷം ഒരുക്കുകയാണ് ഈ സേവനത്തിലൂടെ ലക്ഷ്യമിടുന്നത്.
പ്രാഥമിക പരിചരണത്തില്‍ വൈദഗ്ധ്യം ലഭിച്ച നഴ്‌സുമാരെയായിരിക്കും സ്‌കൂളുകളില്‍ നിയോഗിക്കുക. വിദ്യാഭ്യാസ ഉന്നത വിദ്യാഭ്യാസ മന്ത്രാലയവുമായി സഹകരിച്ച് പ്രൈമറി ഹെല്‍ത്ത്‌കെയര്‍ കോര്‍പറേഷനാണ്(പി.എച്ച്.സി.സി) പദ്ധതി നടപ്പാക്കുന്നത്. രാജ്യത്തെ 258 സ്‌കൂളുകളില്‍ ഇത്തരത്തില്‍ നഴ്‌സുമാരെ നിയോഗിക്കും.
സ്‌കൂള്‍ പരീക്ഷ തുടങ്ങുന്നതോടെ രാജ്യത്തെ സ്‌കൂളുകളുമായി സഹകരിച്ച് ആരോഗ്യകരമായ വിദ്യാഭ്യാസ അന്തരീക്ഷം ഒരുക്കും.
പരീക്ഷയുടെ മാനസിക സമ്മര്‍ദ്ദത്തിനിടെ വിദ്യാര്‍ഥികളുടെ മാനസികാവസ്ഥയെ കേന്ദ്രീകരിച്ച് അവരുടെ ശാരീരിക ആരോഗ്യം ഉറപ്പാക്കുകയെന്നതിനാണ് ഊന്നല്‍ നല്‍കുന്നത്. എല്ലാ വിദ്യാര്‍ഥികള്‍ക്കും അവരുടെ ആവശ്യങ്ങള്‍ക്കനുസൃതമായി പ്രാഥമിക ആരോഗ്യ പരിചരണം ലഭ്യമാക്കുകയെന്നതാണ് നഴ്‌സുമാരുടെ പ്രധാന ഉത്തരവാദിത്വം.
ഒരു അധ്യയന വര്‍ഷത്തില്‍ നാല് തവണ ഓരോ വിദ്യാര്‍ഥികളേയും ആരോഗ്യ പരിശോധനക്ക് വിധേയമാക്കും. എല്ലാ ജനങ്ങള്‍ക്കും മികച്ച ആരോഗ്യം ഉറപ്പാക്കുന്നതില്‍ നഴ്‌സുമാരുടെ പങ്ക് ഒഴിച്ചുകൂടാനാവാത്തതാണെന്ന് സ്‌കൂള്‍ ആരോഗ്യ പദ്ധതി ഡയറക്ടര്‍ അഫ്‌റ മൗസ പറഞ്ഞു.