കണ്ണൂര്‍: തടവുകാരോടു പക്ഷപാതമില്ലാതെ മാന്യമായി പെരുമാറണമെന്നു കണ്ണൂര്‍ സെന്‍ട്രല്‍ ജയില്‍ ഉദ്യോഗസ്ഥര്‍ക്കു നിര്‍ദ്ദേശം നല്‍കിയിട്ടുണ്ടെന്നു ജയില്‍സൂപ്രണ്ട് മനുഷ്യാവകാശ കമ്മിഷനെ അറിയിച്ചു. തടവുകാരനായ ഷംനാദ് തലശ്ശേരി ജില്ലാ ജഡ്ജി വഴി അയച്ച പരാതിയില്‍ കമ്മിഷന്‍ ആക്റ്റിങ് ചെയര്‍പേഴ്‌സണ്‍ പി മോഹന ദാസിന്റെ ഉത്തരവിന്റെ അടിസ്ഥാനത്തിലാണു നടപടി. നിയമം അനുശാസിക്കുന്ന ആനുകൂല്യങ്ങളും ചികിത്സാ സൗകര്യങ്ങളും എല്ലാ തടവുകാര്‍ക്കും ലഭ്യമാക്കാന്‍ ഉദ്യോഗസ്ഥര്‍ക്കു നിര്‍ദേശം നല്‍കി. വിദഗ്ധ ചികിത്സ ആവശ്യമുള്ള തടവുകാര്‍ക്കു ജില്ലാ ആശുപത്രിയിലും കോഴിക്കോട് മെഡിക്കല്‍കോളജിലും ചികിത്സ നല്‍കുന്നതിനു നിര്‍ദേശം നല്‍കിയിട്ടുണ്ടെന്നും റിപ്പോര്‍ട്ടില്‍ പറയുന്നു.
ജയിലില്‍ നിന്ന് അനുമതി ലഭിച്ച് അവധിയിലിരിക്കെ ഒളിച്ചോടുന്ന വ്യക്തിക്കു പ്രസ്തുത കാലയളവ് ക്രമീകരിച്ച് നല്‍കുന്നതു വരെ മറ്റൊരു അവധി അനുവദിക്കാന്‍ കഴിയില്ലെന്നും സൂപ്രണ്ട് അറിയിച്ചു. അത്യാവശ്യഘട്ടത്തില്‍ ഇത്തരം തടവുകാര്‍ക്ക് എസ്‌കോര്‍ട്ട് വിസിറ്റ് അനുവദിക്കാറുണ്ടെന്നും റിപ്പോര്‍ട്ടില്‍ പറയുന്നു. റിപ്പോര്‍ട്ടിന്റെ അടിസ്ഥാ നത്തില്‍ കേസുകള്‍ തീര്‍പ്പാക്കി.