പേപ്പാറ: അഗസ്ത്യവനം ബയോളജിക്കല്‍ പാര്‍ക്ക് പദ്ധതിക്ക് 25 വയസ്. അത്യപൂര്‍വ്വ സസ്യ ജന്തു ജാലങ്ങളെ സംരക്ഷിക്കാനും അതു വഴി വിനോദ സഞ്ചാര, ഗവേഷണ സാധ്യതകളെ പരിപോശിപ്പിക്കുകയും ചെയ്യുന്നതാണ് പദ്ധതി. പക്ഷേ, വര്‍ഷം 25 പിന്നിട്ടിട്ടും പദ്ധതി തുടങ്ങിയയിടത്തു തന്നെ നില്‍ക്കുകയാണ്.
പേപ്പാറ - നെയ്യാര്‍ വന്യജീവി സങ്കേതങ്ങള്‍ക്കിടയില്‍ 23 ചതുരശ്ര കിലോമീറ്റര്‍ വനഭൂമിയാണ് കേരളത്തിനു തന്നെ അഭിമാനമാകുമായിരുന്ന പദ്ധതിക്കായി തിരഞ്ഞെടുത്തിരുന്നത്. 1992 ജനുവരി ഒന്നിന് അന്നത്തെ മുഖ്യമന്ത്രി കെ.കരുണാകരന്‍ തറക്കല്ലുമിട്ടു. പത്തു വര്‍ഷം കൊണ്ട് പൂര്‍ണ വളര്‍ച്ചയില്‍ എത്തുമെന്നായിരുന്നു അന്നത്തെ പ്രതീക്ഷ.
പദ്ധതി വരുന്ന പ്രദേശത്ത് വരുന്ന 56 ആദിവാസി കുടുംബങ്ങളെ കുടിയിറക്കാനുള്ള നീക്കമാണ് വിവാദങ്ങള്‍ ക്ഷണിച്ചുവരുത്തിയത്. ആദിവാസികളെ വനത്തില്‍ നിന്നു പുറത്തിറക്കി, ഇവര്‍ക്കായി ബി ടൈപ്പ് കെട്ടിടങ്ങള്‍ നിര്‍മിച്ചു പാര്‍ക്കില്‍ തന്നെ ജോലിയും നല്‍കാനായിരുന്നു തീരുമാനം. ഇത് വന്‍ പ്രക്ഷോഭത്തിന് വഴി മരുന്നിട്ടു. ആദിവാസികള്‍ സമരരംഗത്തു വന്നു. ഇതിനിടെ പരിസ്ഥിതിക്കും ജൈവവൈവിധ്യത്തിനും ഹാനികരമാണെന്നും പറഞ്ഞ് പരിസ്ഥിതി സംഘടനകളും സമരത്തിനെത്തി.
ഇതിനിടയില്‍ പാര്‍ക്കിനായുള്ള സ്ഥലമേറ്റെടുക്കല്‍ നടപടികള്‍ അധികൃതര്‍ തുടങ്ങി. പദ്ധതിക്കായി കേന്ദ്ര പരിസ്ഥിതി അനുമതി വാങ്ങിയില്ല എന്ന കാര്യം ചൂണ്ടികാട്ടി വനത്തോട് ചേര്‍ന്നു കിടക്കുന്ന ഒരു എസ്റ്റേറ്റിന്റെ ഉടമ ഹൈക്കോടതിയെ സമീപിച്ചു. കോടതി പദ്ധതിക്ക് സ്റ്റേ വിധിച്ചു. അതോടെ പദ്ധതി പൊളിഞ്ഞു. ഈ സ്റ്റേ നീക്കാന്‍ വനം വകുപ്പ് ഒന്നും ചെയ്യാത്തതിനാല്‍ പദ്ധതി ഉപേക്ഷിക്കാന്‍ ബന്ധപ്പെട്ടവര്‍ തീരുമാനിക്കുകയായിരുന്നു.
പാര്‍ക്കിനായി 92 മുതല്‍ 97 വരെ സര്‍ക്കാര്‍ ഫണ്ട് നല്‍കിയിരുന്നു. 1998 മാര്‍ച്ചില്‍ പ്ലാനിങ് ആന്റ് ഇക്കണോമിക്‌സ് അഫയേഴ്‌സ് ഡിപ്പാര്‍ട്ട്‌മെന്റ് പാര്‍ക്കിനുള്ള ഫണ്ട് തടഞ്ഞു. തുടര്‍ന്ന് ഒരു ബജറ്റിലും പദ്ധതിക്കായി പണം വകയിരുത്തിയില്ല.
യു.ഡി.എഫ് സര്‍ക്കാരിന്റെ കാലത്താണ് പദ്ധതി വന്നത്. അതിനാല്‍ മാറി മാറി വന്ന എല്‍.ഡി.എഫ് സര്‍ക്കാരുകള്‍ പദ്ധതിയെ അവഗണിച്ചു. യു.ഡി.എഫ് സര്‍ക്കാരുകള്‍ പദ്ധതി പൊടിതട്ടിയെടുക്കാന്‍ ശ്രമിച്ചെങ്കിലും അണിയറ നീക്കങ്ങള്‍ എതിരായി.
2004ല്‍ കേന്ദ്ര സര്‍ക്കാര്‍ അഗസ്ത്യമലനിരകള്‍ ജൈവവൈവിധ്യമേഖലയായി പ്രഖ്യാപിച്ചു. പാലോട് ബൊട്ടാണിക്കല്‍ ഗാര്‍ഡന്‍ ശാസ്ത്രജ്ഞരാണ് അതിനായി പഠനം നടത്തി റിപ്പോര്‍ട്ട് സമര്‍പ്പിച്ചത്. ബയോളജിക്കല്‍ പാര്‍ക്ക് വരുന്ന 23 ചതുരശ്ര കിലോമീറ്റര്‍ ഒഴിവാക്കിയിട്ടായിരുന്നു റിപ്പോര്‍ട്ട് സമര്‍പ്പിച്ചത്.
എന്നാല്‍ വഴുതക്കാട്ടുള്ള വനം വകുപ്പിന്റെ ആസ്ഥാനത്ത് റിപ്പോര്‍ട്ട് എത്തിയപ്പോള്‍ ചിലര്‍ ചില വെട്ടിത്തിരുത്തലുകള്‍ വരുത്തി. പാര്‍ക്കിനെ അതില്‍ ഉള്‍പ്പെടുത്തുകയും ചെയ്തു. പദ്ധതി യാഥാര്‍ഥ്യമാകുമെന്ന അവസാനത്തെ പ്രതീക്ഷയും അതോടെ തകര്‍ന്നു.
ഏതാണ്ട് പത്തുകോടി രൂപ പദ്ധതിക്കായി വിവിധ രീതികളില്‍ ചിലവഴിച്ചിരുന്നു. പദ്ധതി പ്രദേശത്ത് നിര്‍മിച്ച കെട്ടിടങ്ങള്‍ നോക്കുകുത്തികളായി കിടക്കുന്നു.
ഔഷധ തോട്ടം കാടുകയറി. നടപ്പായിരുന്നെങ്കില്‍ സംസ്ഥാനത്തിന് അഭിമാനമാകുമായിരുന്ന പദ്ധതി, ആസൂത്രണത്തിലെ പിഴവും ഉദ്യോഗസ്ഥരുടെ അനാസ്ഥയും കാരണം പാതിവഴിയില്‍ നിലച്ചു.